Бюро мәліметінше, өткен жылдың қорытындысы бойынша Қазақстанда орташа жалақы көлемі 364 295 теңгені құраған. 2023 жылғы көрсеткіш алдыңғы жылмен салыстырғанда 17,6%-ға артық екені анықталып отыр.
Айта кетейік, 2024 жылғы 1 қаңтардан бастап ең төменгі жалақы 85 000 теңге мөлшерінде белгіленген болатын.
Ал 2023 жылы өңірлік бөліністе ең жоғарғы орташа айлық жалақы - Атырау облысында. Бұл аймақта азаматтардың ең жоғарғы жалақысы - 607 635 теңге. Жалақысы жоғары өңірлер қатарында екінші орынға Маңғыстау облысы жайғасқан. Мұнда айлық мөлшері – 535 156 теңге. Ал Ұлытау облысында жоғарғы жалақы 483 812 теңгені құрап, Қазақстан бойынша үштікке енген.
Ең төменгі жалақы алатын өңірлер қатарында 4 облыс бар. Бюро дерегінде, Солтүстік Қазақстан облысында халықтың ең төменгі жалақысы - 262 248 теңге деп көрсетілген. Жамбыл облысында – 269 125 теңге, Жетісу облысында – 269 378 теңге, Түркістан облысында – 270 660 теңге құрап тұр.
"Салалық құрылымда ең жоғары атаулы жалақы тау-кен өндіру өнеркәсібінде және карьерлерді қазуда –орташа республикалық деңгейден 2,1 есе жоғары, қаржы және сақтандыру қызметінде – 1,9 есе, ақпарат және байланыс саласында – тиісінше 1,6 есе", делінген Ұлттық бюро есебінде.
