Мемлекет басшысы Қасым-Жомарт Тоқаев республика халқына кезекті Жолдауын 1 қыркүйек күні жариялайды деп хабарлайды "Адырна" тілшісі KAZ.NUR.KZ-ке сілтеме жасап.
Бұл туралы ел президентінің баспасөз хатшысы Берік Уәли Facebook әлеуметтік желісіндегі парақшасында жазды.
"Мемлекет басшысының Қазақстан халқына арнаған жыл сайынғы дәстүрлі Жолдауы 2020 жылдың 1 қыркүйек күні өтетін Парламенттің кезекті сессиясының ашылуында жарияланады деп жоспарланып отыр. Парламенттің қос Палатасының бірлескен отырысында Президент Қасым-Жомарт Тоқаев еліміздің дағдарыстан кейінгі кезеңдегі негізгі даму мақсаттары жайында айтады. Жолдаудың басым бөлігі экономикалық және әлеуметтік мәселелерге арналады", - деді ол.
Айта кетейік, мәжіліс төрағасы Нұрлан Нығматулин Қазақстан Республикасы парламенті палаталарының бірлескен отырысын шақыру туралы өкімге қол қойған болатын. Отырыс 1 қыркүйекте сағат 11-де өтеді. Ал Нұрсұлтан Назарбаевтың қатысуымен өтуі тиіс болған Nur Otan саяси кеңес бюросының отрысы тағы да кейінге шегерілді. Бұл туралы Бауыржан Байбек әлеуметтік желісіндегі ресми парақшасында хабардар етті. Оның сөзінше, отырыс 28 тамыз күні өтеді деп жоспарлануда.
Естеріңізге сала кетейік, 2019 жылдың екінші қыркүйегінде мемлекет басшысы Қасым-Жомарт Тоқаев Қазақстан халқына алғашқы жолдауын жасаған болатын.
"Адырна" ұлттық порталы
