Түркия билігі Ыстамбұл мэрі Экрем Имамоғлуды қамауға алды, деп хабарлайды "Адырна" ұлттық порталы.
Ол – елдегі ең ықпалды оппозициялық саясаткерлердің бірі және қазіргі президент Режеп Тайып Ердоғанның негізгі қарсыласы әрі президенттікке басты үміткер.
Имамоғлуға жемқорлық, қылмыстық ұйымды басқару, тендерлік алаяқтық және тыйым салынған Күрдістан жұмысшы партиясына (РПК) жәрдемдесу айыптары тағылды.
Тергеу аясында 100 адамды, оның ішінде журналистерді, кәсіпкерлерді және мэрдің ең жақын серіктерін қамауға алу туралы ордер берілді. Олардың қатарында Имамоғлуға ақпараттық қолдау көрсеткен кеңесшісі Мурат Оңгун да бар. Сонымен қатар, мэрдің резиденциясында тінту жүргізілді.
Қамауға алынардан бір күн бұрын Ыстамбұл университеті Имамоғлуның дипломын жарамсыз деп таныды. Бұл – Түркия Конституциясына сәйкес оның президенттік сайлауға түсу құқығынан айырылатынын білдіреді.
Имамоғлу өз қамауға алынуын «мазақ ету» деп атап, биліктің оның саяси мансабына тосқауыл қоюға тырысқанын айтты.
«Мен қорықпаймын, тік тұрып, күресімді жалғастырамын», – деп мәлімдеді ол әлеуметтік желі арқылы жақтастарына.
Осы оқиғаға байланысты Ыстамбұл билігі қалада кез келген қоғамдық жиналыстар мен наразылық шараларын өткізуге төрт күнге уақытша шектеу қойды.
