Түркістанның еңбек мобильділігі орталығында іс жүзінде жұмысқа тұрмаған адамдарға жалақы төленген. Бұл туралы бүгін, 21 тамызда Қаржылық мониторинг агенттігінің баспасөз қызметі айтты, деп хабарлайды «Адырна» тілшісі.
Облыстық жұмыспен қамтуды үйлестіру және әлеуметтік бағдарламалар басқармасының «Еңбек мобильділігі орталығы» КММ-нің қызметкерлерімен мемлекетке 130 млн теңгеден астам залал келтірілді.
«Жауапты тұлғалар «2021-2025» жылдарға арналған кәсіпкерлікті дамыту жөніндегі ұлттық жобасы» аясында субсидияланған жұмыс орындарына қатысушы тұлғалардың жалақыларын төлеу барысында бірқатар кәсіпорын басшыларымен сөз байласып, мекемелерде іс жүзінде жұмыс жасамайтын 132 азаматтың жеке деректерін «Еңбек нарығы» автоматтандырылған ақпараттық жүйесіне енгізіп, оларға аударылған айлық жалақыларын иемденіп отырған»,—делінген хабарламада.
