Мемлекеттік күзет қызметінің әскерилері Ақмола облысының Жібек жолы ауылына барды. Олар құтқарушыларға су тасқыны салдарын жоюға көмектеседі, деп хабарлайды «Адырна» тілшісі ТЖМ-ның баспасөз қызметіне сілтеме жасап.
«Осы сәтте Ақмола облысы Жібек Жолы ауылында Мемлекеттік күзет қызметі күштерінің тобы авариялық-құтқару жұмыстарын жүргізуде. МКҚ қызметкерлері елді мекенге жақын жердегi үйінді бөгеттің жағалауын нығайтуда және су тасқынынан зардап шеккен жергілікті тұрғындарға медициналық көмек көрсетіп жатыр»,—делінген хабарламада.
Айта кетейік, мемлекеттік күзет қызметі — президентке тікелей бағынатын және есеп беретін, елдің ұлттық қауіпсіздігін қамтамасыз ететін күштерге жататын және президенттің, басқа да күзетілетін адамдардың және объектілердің қауіпсіздігін қамтамасыз ету бойынша күзет іс-шараларын жүзеге асыратын арнаулы мемлекеттік орган.
