Германияның қорғаныс министрі Борис Писториус Украинаға 500 миллион еуро көлеміндегі әскери көмектің жаңа пакетін жариялады. Бұл туралы 19 наурызда Германиядағы америкалық "Рамштайн" авиабазасында Украинаны қолдау жөніндегі байланыс тобының кездесуінде айтылды, деп хабарлайды “Адырна” ұлттық порталы.
"Біз осы Рамштайндағы кездесуге шамамен жарты миллиард еуро болатын тағы бір көмек пакетін дайындадық", - деді Писториус.
Ресей бұған дейін НАТО елдеріне Украинаға қару-жарақ жеткізуге байланысты нота жолдаған болатын. Ресей сыртқы істер министрі Сергей Лавров Украинаға арналған қаруы бар кез келген жүк Ресей үшін заңды нысанаға айналатынын айтты.
Сондай-ақ, Ресей сыртқы істер министрлігі НАТО елдері Украинаға қару-жарақ жеткізіп, "отпен ойнауда" деп мәлімдеді.
Ресей президентінің баспасөз хатшысы Дмитрий Песков Украинаға Батыстан қару-жарақ жөнелту ресей-украин келіссөзінің өтуіне кері әсер ететінін айтты. Ал Лавров АҚШ пен НАТО Украинадағы қақтығысқа "тек қару-жарақ жеткізу арқылы емес, сонымен бірге Ұлыбритания, Германия, Италия және басқа елдердің аумағында кадр даярлау арқылы" тікелей араласып жатқанын мәлімдеді.
