ҚР Мемлекеттік кеңесшісі Ерлан Қарин саяси қуғын-сүргін құрбандарын толық ақтау жөніндегі мемлекеттік комиссияның кезекті отырысын өткізді. Бұл туралы Ақорданың баспасөз қызметі хабарлады, деп жазады "Адырна" ұлттық порталы.
"Жиында Мемлекеттік комиссияның 2022 жылы атқарған қызметінің негізгі қорытындылары қаралды. Мемлекеттік комиссия жұмысының басты нәтижелерінің бірі ретінде саяси қуғын-сүргін тарихына арналған материалдар мен құжаттардың 31 томдық жинағының жарық көргенін айтуға болады. Отырыс барысында еңбекті дайындаған авторлардың қатысуымен көптомдықтың тұсаукесер рәсімі өтті",- делінген Ақорда таратқан хабарламада.
Кітаптар ХХ ғасырдың 20-50 жылдарындағы саяси қуғын-сүргін құрбандарының түрлі санаттарына қатысты бұрын жарияланбаған архив құжаттары мен материалдарынан құралған. Мемлекеттік комиссияның материалдарын жарыққа шығару жұмысы биыл да бірыңғай серия шеңберінде жалғасатын болады.
Сондай-ақ, тиісті мемлекеттік органдардың басшылары арнайы және ведомстволық архив қорларындағы құжаттарды құпиясыздандыруға, архив материалдарын жүйелеуге және цифрландыруға қатысты атқарған жұмыстары жайында баяндады.
"Саяси қуғын-сүргін құрбандарын толық ақтау жөніндегі мемлекеттік комиссияның 2022 жылы атқарған жұмысының қорытындысы: 1) Бас прокуратураның, Ішкі істер министрлігінің және Ұлттық қауіпсіздік комитетінің архивтерінде зерттеу жұмыстары жүргізіліп, 2,5 миллионнан астам материалдар құпиясыздандырылды. 2) 311 мың адам ақталды. 3) 31 том деректер жинағы жарыққа шықты. 2023 жылы да Комиссия өз жұмысын жалғастырады", - деп жазды Ерлан Қарин өзінің Instagram парақшасында.
Жиын соңында 2023 жылы қолға алынатын басты бағыттар бойынша, ғылыми-зерттеу және қуғын-сүргін құрбандарын ақтау жұмыстарын жалғастыруға қатысты тапсырмалар берілді.
"Адырна" ұлттық порталы
