Ақпарат және қоғамдық даму министрлігі Дін істері комитетінің төрағасы Ержан Нүкежанов дін саласындағы заңдарға сәйкес "дінге сенбейтіндердің құқықтары" деген анықтама енгізілетінін мәлімдеді, деп хабарлайды "Адырна" ұлттық порталының тілшісі.
- Біз діндарлар мен дінге сенбейтіндердің де құқықтарын бірдей қамтамасыз етуді көздейміз. Осыған байланысты, біз әлемдік тәжірибеге сүйене отырып, "дінге сенбейтіндердің құқықтары " деген ұғымды енгізуді жоспарлап отырмыз. Мысалы, қазіргі уақытта бізде дінге сенушілердің құқықтары бар, сол сияқты біз дінге сенбейтіндердің құқықтарын да шектемеуіміз тиіс. Біз – зайырлы мемлекетпіз. Дінге, конфессияға, этникалық қатыстылыққа қарамастан заңның үстемдігі бәрінен жоғары, – деп хабарлады Нукежанов ОКҚ брифингінде.
Сондай-ақ, оның айтуынша, елімізде діни ахуал тұрақты. Алдағы уақытта дін саласындағы заңнаманы жетілдіру бойынша тағы бірқатар өзгерістер болады деп жоспарлануда.
- Біздің комитет дін саласындағы заңнаманы жетілдіру бойынша бірқатар жұмысты жалғастырып жатыр. Соның аясында біз діни бірлестіктерді тіркеуді және діни іс - шараларды өткізу мәселелерін оңайлатуды көздейтін кейбір түзетулер енгізуді жоспарлап отырмыз, – дейді спикер.
Айта кетейік, 2019 жылы Қазақстанда дінге сенбейтін адамдардың саны барлық халықтың 18%-ын құраған. Ал 75%-ы өздерін дінге сенетіндердің қатарына жатқызды. Бірақ, көбісінің діни әдет-ғұрыпты қатты сақтамайтыны, діни бірлестіктерге де көп қатыса бермейтіні анықталған еді.
"Адырна" ұлттық порталы
