Шымкент қаласында ауа температурасының төмендеуіне байланысты жылыту маусымы ұзартылды. Сәуір айының алғашқы күндерінде синоптиктердің болжауынша ауа температурасы түнде төмендеуі күтілуде. Осы себепті қала әкімінің өкімімен жылыту маусымы ұзартылып, 5 сәуірде тоқтату туралы шешім шығарылды. Бұл жөнінде қалалық энергетика және коммуналдық шаруашылық басқармасы мәлім етті.
Олардың айтуынша, мәслихат қабылдаған жылыту маусымын өткізу ережесіне сәйкес жылыту маусымын 23 наурызда тоқтату керек болған. Бірақ, денсаулық сақтау басқармасына қарасты мекемелердің өтініштері мен қаладағы карантинге орай және ауа температурасының төмендеуіне байланысты ұзартылып отыр.
Ережеге сәйкес, ауа-райы 5 тәулік бойы +8 градус және одан жоғары болған жағдайда жылыту маусымы тоқтатылуы тиіс. Айта кетейік, 2020 жылы жылыту маусымы 1 сәуірде тоқтатылған болатын.
Шымкент қаласы әкімдігінің баспасөз қызметі
