Көлікті тіркеуде онлайнға өтті

2604

Бұдан былай автокөлікті мобильді қосымша арқылы онлайн тіркеуге болады. Бұл туралы «Адырна» ұлттық порталы Ішкі істер министрлігінің ресми сайтына сілтеме жасай отырып хабарлайды.

2021 жылғы 25 қаңтарда Astana Hub алаңында ҚР Цифрлық даму, инновациялар және аэроғарыш өнеркәсібі министрі Бағдат Мусин мен ҚР Ішкі істер министрі Ерлан Тұрғымбаевтың бірлескен кеңесі өтті.

Кеңес барысында Бағдат Мусин мен Ерлан Тұрғымбаев цифрландыру саласындағы бірлескен жобалар мен алдағы жұмыс жоспарларын талқылады.

Сондай-ақ, Цифрлық даму, инновациялар және аэроғарыш өнеркәсібі министрлігі   Ішкі істер министрлігімен  бірлесіп жүзеге асырған екінші деңгейдегі банктердің мобильді қосымшаларында көлік құралдарын қайта тіркеу сервисі таныстырылды.

Бұрын жеке тұлғалар автокөлікті тек Мамандандырылған Халыққа қызмет көрсету орталықтарында немесе “Электрондық үкімет” порталында тіркей алатын. Пилоттық режимде бұл мемлекеттік қызмет Kaspi.kz қосымшасында апробацияланды. Автокөлікті онлайн тіркеу мүмкіндігі басқа да мобильді қосымшаларда пайда болады.

Енді сатушы қосымшада автомобильді есептен шығарғанда, сервис көлік құралының шектеулерінің, айыппұлдарының және салық берешектерінің бар-жоғына автоматты түрде тексеру жүргізеді. Егер төленбеген салықтар мен айыппұлдар болса, сатушы оларды бірден сол қосымшада төлей алады. Сатып алушы сатып алу үшін ақша аударады, баж салығын төлейді, автокөлікті есепке қояды және мемлекеттік нөмір белгісін онлайн таңдайды, – деді  Бағдат Мусин.

Жаңа сервисті пайдалана отырып, автокөлікті сатып алушы мен сатушы мемлекеттік органдарға жүгінбей, бұл процедураларды өз бетінше жасай алады. Онлайн мәміле аяқталғаннан кейін құжаттарды және мемлекеттік нөмірлік белгіні “Электрондық үкімет” порталы арқылы үйге жеткізуге тапсырыс беруге немесе оларды Мамандандырылған ХҚКО-дан алып кетуге болады, – деп толықтырды Ерлан Тұрғымбаев.

"Адырна" ұлттық порталы

фото ашық дереккөзден алынды

Пікірлер
Редакция таңдауы