Қазақстан сөз бостандығы рейтингінде 141-орынға тұрақтады, деп хабарлайды “Адырна” ұлттық порталы ҚазТАГ-қа сілтеп.
2 мамырда «Шекарасыз тілшілер» (RSF) халықаралық ұйымы әлемдегі сөз бостандығы бойынша жыл сайынғы рейтингін жариялады. Қазақстан бұл тізімде 141-орынға жайғасып, 100 мүмкін ұпайдың 39,34-ын жинаған.
Зерттеу бес негізгі көрсеткіш бойынша бағаланған. Олар — саяси ахуал, құқықтық база, экономикалық жағдай, әлеуметтік-мәдени орта және журналистердің қауіпсіздігі. Ұйым дерегінше, 180 елдің 160-ында бұқаралық ақпарат құралдары толыққанды немесе тұрақты түрде жұмыс істей алмай отыр.
Қазақстанның көршілері де төмен орындарда тұрақтады. Қырғызстан – 144 орын, Өзбекстан – 148, ал Тәжікстан – 153 орында тұр.
RSF ұйымы тәуелсіз журналистиканың маңыздылығын атап өтіп, экономикалық қысымның және саяси ықпалдың салдарынан көптеген редакциялардың жабылып жатқанын ескертті.
Жақсы нәтиже көрсеткен елдер қатарында Норвегия, Эстония, Швеция – үздік үштік, Армения (34) және Молдова (35) бар. Ал Түркіменстан (174) – аймақтағы ең төменгі орын.
Сөз бостандығының рейтингі жыл сайын 3 мамыр, Дүниежүзілік баспасөз бостандығы күні қарсаңында жарияланады. Бұл күн БҰҰ Бас Ассамблеясыныңн 1993 жылғы 21 желтоқсандағы шешімімен жыл сайын 3 мамырда аталып өтеді. 1991 жылы дәл осы күні Намибия Республикасының астанасында «Виндхук декларациясына» қол қойылған. Онда жиналғандар барлық елдің билігін сөз бостандығы мен баспасөздің жариялылығын қамтамасыз етуге шақырған болатын.
