АҚШ президенті Дональд Трамп Ауғанстан мәселелері бойынша Мемлекеттік хатшы көмекшісінің орынбасары қызметіне 33 жастағы Мэри Кабир-Серадж Бишопингті (Mary Kabir-Seraj Bischoping) тағайындады. Бұл туралы “Khaama Press” жазды, деп хабарлайды “Адырна” ұлттық порталы.
Бишопинг АҚШ-тың Ауғанстанға қатысты сыртқы саясатын Мемлекеттік департаменттің Оңтүстік және Орталық Азия істері бюросы аясында қадағалайды. Бұған дейін АҚШ пен Ауғанстан арасындағы қатынасты осы ел бойынша арнайы өкіл Томас Уэст пен ауған әйелдері мен қыздарының құқықтары жөніндегі арнайы өкіл Рина Амиири қамтамасыз еткен.
Мэри Кабир-Серадж Бишопинг — 33 жаста, Ауғанстанды 1823 жылдан 1978 жылға дейін басқарған Баракзай әулетінің ұрпағы. Ол — Аманулла-хан мен патшайым Сорайя Тарзидің шөбересі. Оның әжесі Латифа Кабир Серадж — Ауғанстандағы алғашқы әйел журналистердің бірі болған.
Бишопинг Калифорнияда туып өскен. Оның отбасы 1979 жылы Кеңес әскерінің басып кіруінен кейін саяси қауіп-қатерге байланысты Ауғанстаннан көшіп кеткен. Ата-анасы Еуропада білім алып, кейін Оңтүстік Калифорнияда тұрақтаған. Бишопинг Германияда үш жылға жуық адам құқықтары ұйымдары мен халықаралық басылымдарда волонтер болып жұмыс істеген. Ол Лос-Анджелестегі Калифорния университетінде саясаттану мамандығы бойынша бакалавр дәрежесін, ал Вирджиния университетінде заң ғылымдарының докторы дәрежесін алған. Парсы және неміс тілдерін еркін меңгерген.
2021 жылы АҚШ әскері Ауғанстаннан шығарылғаннан кейін Бишопинг Мемлекеттік департаменттің заң мәселелері жөніндегі кеңесшілер кеңсесінде жұмыс істей бастады. 2023 жылы ол АҚШ Өкілдер палатасының Сыртқы істер жөніндегі комитетінің аға кеңесшісі болып тағайындалып, Ауғанстаннан әскер шығаруға қатысты тергеуді басқарды және аймақтық стратегия бойынша кеңес берді.
