Биыл қыркүйектен бастап Өзбекстанның бақылау-өткізу пункттерінде көліктерге арналған «жасыл» және «қызыл» дәліз жүйесі енгізіледі, деп хабарлайды "Адырна" ұлттық порталы.
Бұл жүйе Өзбекстан президенті Шавкат Мирзиеёвтің қол қойған жарлығы негізінде іске қосылады. Жаңа жүйе алғашында Ташкент облысындағы «Гишткуприк» («Жібек жолы» Қазақстанмен шекаралас) және «Зангиота» («Қапланбек») өткізу пунктілерінде, сондай-ақ Қарақалпақстандағы «Дәуіт-ата» («Тәжен») өткізу пунктерінде жұмыс істей бастайды.
Жүйенің басты мақсаты – қауіпсіз тауар тиелген көліктерді «жасыл» дәліз арқылы жедел тексеруден өткізу. Ал «қызыл» дәлізге түскен көліктерге толық кедендік бақылау жүргізіледі. Дегенмен, егер «жасыл» дәліз арқылы өтетін көлікте қандай да бір күдік туындаса, оған қосымша тексеру жүргізілуі мүмкін.
Бұл жоба әзірге пилоттық негізде енгізіледі. Егер ол тиімді нәтиже көрсетсе, 2026 жылдың 1 қыркүйегінен бастап барлық шекара пунктілерінде жүзеге асырылады.
Сонымен қатар, Қазақстан мен Өзбекстан арасында қосымша төрт сауда дәлізін ашу жоспарланып, жүк тасымалы мәселесін шешу үшін жедел штаб құрылатын болады. Алдағы уақытта қазақ-өзбек шекарасында жаңа кеден терминалы да ашылады, ол 6 гектар аумақты қамтып, заманауи тексеру және рәсімдеу құрылғыларымен жабдықталмақ.
