Қазақстанда атом саласы үшін білікті кадрлар даярлау белсенді түрде жүзеге асырылуда. Энергетика министрлігінің мәліметінше, елімізде физика, энергетика, электротехника және тау-кен инжинирингі секілді салаларға байланысты 18 білім беру бағдарламасы бойынша мамандар даярланады, деп хабарлайды "Адырна" ұлттық порталы.
2024-2025 оқу жылына осы бағыттар үшін 5 246 білім беру гранты бөлінген, оның ішінде бакалавриат үшін 4 530 грант, магистратура үшін 590 грант, докторантура үшін 126 грант қарастырылған.
Мамандарды даярлау Қазақстанның жоғары оқу орындарында, сондай-ақ ядролық технологияларға маманданған жетекші шетелдік жоғары оқу орындарымен ынтымақтастық аясында жүзеге асырылуда.
«Болашақ» мемлекеттік бағдарламасы аясында «Атом және ядролық өнеркәсіп» мамандығы басым бағыттар қатарына кіреді. 2024 жылдан бастап АҚШ, Ұлыбритания және Францияда осы мамандық бойынша білім алатын төрт магистрант дайындалуда, ал Ресей мен Мажарстан да осы елдер қатарына қосылмақ.
Атом саласы бойынша кадрларды даярлау үшін қазақстандық жоғары оқу орындарында 5 білім беру және екі дипломдық бағдарламалар бар. Бұл бағдарламалар ядролық физика, ядролық инженерия, атом энергетикасы және теориялық ядролық физика салаларында білім алуды қамтиды. Сонымен қатар, Қазақстан шетелдік әріптестерімен ғылыми және білім беру базасын дамыту бойынша жұмыс жүргізуде. Франция, Ресей және Венгриямен бірқатар құжаттарға қол қойылған.
Қазақстанның отын-энергетикалық кешенін дамытудың 2023-2029 жылдарға арналған тұжырымдамасына сәйкес, атом саласы бойынша жоғары білікті кадрлар даярлау үшін шетелдік бағдарламалар арқылы оқуға гранттар бөлінеді. Сонымен қатар, жұмыс істеп тұрған атом электр станцияларында практикалар мен тағылымдамалар ұйымдастырылады.
