ҚР Бас прокуроры Берік Асыловқа депутат Ермұрат Бапи қоғамда резонанс тудырған мәселелерге қатысты депутаттық сауал жолдады, деп хабарлайды "Адырна" ұлттық порталы.
Депутаттың айтуынша, соңғы уақытта ұлттық құндылықтар мен дәстүрлерге шабуыл жасайтын оқиғалар жиілеп кетті. Соның ішінде, Атырауда мемлекеттік рәмізге қатысты заң бұзушылық үлкен алаңдаушылық туғызды. Мұз айдынында өткен спорттық жарыс кезінде төрт әйел Қазақстанның мемлекеттік туын ұстап тұрған суреті тараған. Алайда тудың бетінде араб жазуы мен қылыш бейнеленген белгі болған.
Ермұрат Бапи бұл әрекетті қарапайым құқықбұзушылық емес, еліміздің мемлекеттігі мен ұлттық бірегейлігіне қарсы жасалған ашық арандату деп бағалады.
"Бұл – біздің қоғамымызға, мемлекеттігімізге, ұлттық дәстүріміз бен бірегейлігімізге жасалған ашық және нақақ қарсылық. Мемлекеттік туды қорлау – бүкіл халықты, тұтас мемлекетті қорлау!" – деді ол.
Сонымен қатар, депутат Wildberries Russ платформасында Қазақстан туының бұрмаланған нұсқасы сатылымда тұрғанын мәлімдеді. Бұл жағдайдың қалай орын алғанын анықтау және жауапты тұлғаларды жазалау қажет екенін атап өтті.
"Бұл не сұмдық?! Бұған кім жол беріп отыр?!" – деп наразылығын білдірді депутат.
Сауалда көтерілген негізгі ұсыныстар:
-
Мемлекеттік туды заңсыз өзгерткен адамдар мен ұйымдастырушыларды анықтап, қатаң жаза қолдану.
-
Заңсыз өзгертілген мемлекеттік рәміздерді сатуға тыйым салып, оларды нарықтан алып тастау.
-
Радикалды ағымдардың әрекеттерін бақылауды күшейтіп, заңнаманы қатайту.
-
Орта мектептерде дінтану сабақтарын ұлттық құндылықтарға негіздеу.
-
Ұлттық мәдениетті дамыту және дәстүрлі киім кию бастамаларын қолдау.
Депутат бұл мәселе қоғам тұрақтылығына қауіп төндіруі мүмкін екенін ескертіп, мемлекеттік органдардан шұғыл әрекет етуді талап етті.
"Біз мұндай қауіптерге көз жұмып қарай алмаймыз. Мұндай арандатушылықтың жолын кесу үшін, тиісті органдар дереу шара қолдануы керек" – деп түйіндеді Ермұрат Бапи.
