Мәжіліс депутаты Ермұрат Бәпи Қайрат Сатыбалдының активтері қайтарылып жатқаны туралы ақпарға күмәнмен қарайтынын мәлімдеді, деп хабарлайды «Адырна» тілшісі.
«Оны шартты түрде мерзімінен бұрын босатуға дайындап жатыр ма, әлде таза рақымшылық жасай ма? Ұрланған активтерді өз еркімен қайтарғаны жақсы. Алайда көрсетілген сол сомалардың ел қазынасына түсіп жатқаны қаншалықты рас? Көрсетілген ресми сандарға сенеміз бе, әлде сенбейміз бе, оны тек болжау ғана қалды. Себебі қайтарылған активтер жинақталатын 100% үкіметтік компанияға қоғамдық бақылау жүргізілмейді», - деді ол.
Еске салайық, соңғы кездері экс-президент Нұрсұлтан Назарбаевтың немере інісі Қайрат Сатыбалдының активтерді қайтарып жатқаны жайлы хабар жиілеген болатын. Бүгін Бас прокуратураның Активтерді қайтару жөніндегі комитеті Қайрат Сатыбалдының мемлекетке 50 миллиард теңгеден астам активті қайтаратынын айтқан еді.
