قازاقستاننىڭ بىرىككەن اراب امىرلىكتەرىندەگى ەلشىسىنىڭ كەڭەسشىسى، ديپلومات ساكەن ماماشقا قاتىستى قىلمىستىق ءىس قوزعالدى. بۇل تۋرالى استانا قالاسىنىڭ پوليتسيا دەپارتامەنتى ايتتى، دەپ حابارلايدى «ادىرنا» ءتىلشىسى.
«اتالعان فاكتى بويىنشا قىلمىستىق ءىس قوزعالدى. تەرگەۋ مۇددەسىنە قاتىستى باسقا مالىمەتتەر جاريالانبايدى»،- دەدى دەپارتامەنت.
ەسكە سالايىق، بۇعان دەيىن ساكەن ماماشتىڭ ايەلى كارينا ماماش ۆيدەوۇندەۋ جاساپ، كۇيەۋىنەن قورلىق كورگەنىن ايتقان ەدى.
"مەن، ماماش كارينا گوسمانقىزى، ءباا-دەگى ەلشىنىڭ كەڭەسشىسى ماماش ساكەن تاشكەنبايۇلىنىڭ جۇبايىمىن. 10 جىل بويى زورلىق-زومبىلىققا ۇشىراپ كەلەمىن. ماعان كورسەتكەن بۇكىل قورلىعى – ونىڭ ىشىندە فيزيكالىق، سەكسۋالدىق، ەموتسيونالدىق، ەكونوميكالىق، تۇرمىستىق زورلىق-زومبىلىق ءۇشىن كۇيەۋىمدى ديپلومات مارتەبەسىنەن ايىرىپ، تۇرمەگە وتىرعىزعانىن قالايمىن", - دەگەن ەدى كارينا ماماش.
كارينا 5 مامىر كۇنى كۇيەۋى وعان جانە ونىڭ اپكەسىنە كۇش كورسەتكەنىن دە ايتقان.
سول كەزدە «نەمولچي» قورىنىڭ جەتەكشىسى دينا ءتاڭسارى پرەزيدەنتكە، ىشكى جانە سىرتقى ىستەر مينيسترلىكتەرىنە ۇندەۋ جاساعان. ول «ىشكى ىستەر مينيسترلىگىنەن قازاقستاننىڭ ءباا-دەگى ەلشىسىنىڭ كەڭەسشىسى جاساپ وتىرعان ارەكەتكە ارالاسىپ، ايەلىن كۇيەۋىنەن قورعاۋدى تالاپ ەتەمىز،"- دەپ مالىمدەگەن.
سىرتقى ىستەر مينيسترلىگى دە سول كەزدە وقيعاعا قاتىستى بىردەن رەاكتسيا بىلدىرگەن.
«ءبىز بۇل قىزمەتكەردى شۇعىل تۇردە قازاقستانعا شاقىرىپ جاتىرمىز، ەندى ونىڭ ىسىمەن قۇقىق قورعاۋ ورگاندارى اينالىسادى»، - دەگەن سىرتقى ىستەر مينيسترلىگىنىڭ رەسمي وكىلى ايبەك سمادياروۆ.
كارينا مامىر ەلگە جەتكىزىلگەن سوڭ 9 مامىردا ول استاناداعى داعدارىس ورتالىعىنا ورنالاستىرىلدى.
