قازاقستان رەسپۋبليكاسى پرەمەر-ءمينيسترىنىڭ ورىنباسارى تامارا دۇيسەنوۆا «عىلىم ورداسى» رەسپۋبليكالىق مەملەكەتتىك كاسىپورنىنىڭ ورتالىق عىلىمي كىتاپحاناسىنا قاتىستى دەپۋتاتتىق ساۋالعا جاۋاپ بەردى، دەپ حابارلايدى "ادىرنا" ۇلتتىق پورتالى كازتاگ اگەنتتىگىنە سىلتەپ.
«ورتالىق عىلىمي كىتاپحانا 2012 جىلدان عىلىم جانە جوعارعى ءبىلىم مينيسترلىگىنىڭ «عىلىم ورداسى» رەسپۋبليكالىق مەملەكەتتىك كاسىپورنىنىڭ («عىلىم ورداسى») قۇرىلىمدىق بولىمشەسى بولىپ تابىلادى. «عىلىم ورداسى» قۇرامىندا كىتاپحانادان باسقا 4 مۋزەي (تابيعات، ارحەولوگيا، سيرەك كەزدەسەتىن كىتاپتار جانە قازاقستان عىلىمىنىڭ تاريحى مۋزەيلەرى), عىلىمي ارحيۆ، عىلىمي كادرلاردى دايارلاۋ ورتالىعى بار كوپ فۋنكتسيونالدى مەكەمە»، - دەپ جاۋاپ بەردى تامارا دۇيسەنوۆا.
ونىڭ ايتۋىنشا، كىتاپحانانىڭ ماتەريالدىق تەحنيكالىق بازاسىن نىعايتۋ ماقساتىندا رەستاۆراتسيا جانە كونسەرۆاتسيا ورتالىعى قۇرىلدى. ول 65 بىرلىكتەن تۇراتىن، جالپى سوماسى ت625 ملن قۇرايتىن زاماناۋي رەستاۆراتسيالاۋ قوندىرعىلارىمەن جانە ءارتۇرلى فورماتتاعى جىلدامدىعى جوعارى وندىرىستىك روبوت سكانەرلەرمەن جابدىقتالدى.
وسىنىڭ ناتيجەسىندە 18 مىڭعا جۋىق سيرەك كەزدەسەتىن كىتاپتار مەن قولجازبالار تسيفرلىق فورماتقا كوشىرىلىپ، وقىرماندار مەن عالىمداردىڭ عىلىمي ىزدەنىستەرىنە ىڭعايلى بولۋ ءۇشىن كىتاپحانانىڭ ۆەب-سايتىندا ورنالاستىرىلعانىن حابارلادى.
سونىمەن قاتار ۆيتسە-مينيستر مەملەكەت باسشىسىنىڭ تاپسىرماسىنا سايكەس بۇگىنگى كۇنى «عىلىم ورداسى» عيماراتتارىنىڭ كەشەنىندە كۇردەلى جوندەۋ جۇمىستارى جۇرگىزىلىپ جاتقانىن، وقۋ زالدارىندا اۋا باپتاعىشتار ورناتىلعانىن اتاپ ءوتتى.
«جالپى كىتاپحانا قورىن تولىقتىرۋعا جىل سايىن مەملەكەت تاراپىنان قارجى ءبولىنىپ وتىرادى، سوڭعى ءۇش جىلدا كىتاپحاناعا ت70 ملن ءبولىندى (2022 جىلى – ت30 ملن، 2023 جىلى – ت17 ملن، 2024 جىلى - ت23 ملن). كىتاپحانانىڭ كىتاپ قورى 2019 جىلى – 30000, 2020 جىلى – 30008, 2021 جىلى – 18500, 2022 جىلى – 8678, 2023 جىلى – 5044 بىرلىككە تولىققان»، - دەپ مالىمدەدى دۇيسەنوۆا.
سونداي-اق ۇكىمەت باسشىسىنىڭ ورىنباسارى مەرزىمدى عىلىمي باسىلىمدارعا جازىلۋ مەملەكەتتىك ساتىپ الۋ پورتالى ارقىلى ىسكە اسىرىلاتىنىن جانە كەلىپ تۇسكەن گازەت، جۋرنالدار مەن مونوگرافيالار رەت-رەتىمەن ساندارى بويىنشا تىركەۋگە الىنىپ، باعىتىنا قاراي قورلاردا ساقتالىنىپ، وقىرمانداردىڭ سۇراۋى بويىنشا بەرىلىپ وتىراتىنىن ايتتى.
«قازىرگى ۋاقىتتا كىتاپحانا جاس عالىمدار مەن مامانداردى عىلىمعا تارتۋ ماقساتىندا عىلىممەن اينالىسۋعا ارنالعان مۋلتيمەديالىق الاڭعا اينالۋدا. كىتاپحانادا عالىمدار تۇراقتى نەگىزدە پانارالىق عىلىمي زەرتتەۋلەر جۇرگىزىپ، ءار توقسان سايىن سەمينارلار، فورۋمدار، كوۆوركينگتەر، سيمپوزيۋمدار، كونفەرەنتسيالار جانە تاعى باسقا ءىس-شارالار وتكىزىلىپ وتىرادى»، - دەدى پرەمەر-ءمينيستردىڭ ورىنباسارى.
دۇيسەنوۆانىڭ سوزىنشە، كىتاپحانا عىلىم، ءوندىرىس، ءبىلىم بەرۋ جانە مەملەكەتتىك باسقارۋ سالالارىنداعى عىلىمي مەكەمەلەرمەن تىعىز بايلانىستا بولا وتىرىپ، الەمدىك جەتىستىكتەردى ناسيحاتتايتىن، جاريالانباعان قۇجاتتار قورىن قالىپتاستىرادى. قولجازبالاردى عىلىمي سيپاتتاۋ جانە اقپاراتتىق-كىتاپحانالىق پروتسەستەردى اۆتوماتتاندىرۋ سالاسىندا زەرتتەۋ جانە ادىستەمەلىك جۇمىستاردى جۇرگىزەدى.
وسىعان بايلانىستى، كىتاپحانا عىلىمي قىزمەتتى دامىتۋدىڭ نەگىزگى فاكتورلارىنىڭ ءبىرى ەكەنىن ەسكەرىپ، ونى عىلىم ورداسىنىڭ قۇرامىندا قالدىرۋ ماڭىزدى دەپ ويلايدى.
"كىتاپحانانىڭ قىزمەتكەرلەرىنىڭ جالاقىسى ۇكىمەتتىڭ قاۋلىسىمەن ايقىندالادى جانە مەملەكەتتىك مەكەمەلەر مەن قازىنالىق كاسىپورىنداردىڭ بارلىق قىزمەتكەرلەرى ءۇشىن بىرىڭعاي بولىپ تابىلادى. 2022-2023 جىلدارى كىتاپحاناشىلاردىڭ جالاقىسى 20% كوتەرىلىپ، بۇگىنگە ولاردىڭ ورتاشا جالاقىسى ت170 مىڭ قۇرايدى", - دەپ مالىمدەدى ۆيتسە-پرەمەر.
ايتا كەتسەك، ءماجىلىس دەپۋتاتتارى «عىلىم ورداسى» رمك ورتالىق عىلىمي كىتاپحاناسىنىڭ جاعدايىنا قاتىستى ماسەلەلەردى شەشۋ ءۇشىن تومەندەگى ۇسىنىستارىن ايتقان:
1. ورتالىق عىلىمي كىتاپحاناعا جەكە «كىتاپحانا» ستاتۋسىن بەرۋ كەرەك. ياعني، «عىلىم ورداسى» رەسپۋبليكالىق مەملەكەتتىك كاسىپورنى مەكەمەسىنىڭ ءبىر ءبولىمى ەمەس، دەربەس كىتاپحاناعا اينالۋى ءتيىس;
2. ءبىر عاسىرعا جۋىق ۋاقىتتان بەرى جينالىپ كەلە جاتقان قۇندى كىتاپتار مەن مەرزىمدى باسىلىمداردى كۇتىمگە الىپ، ساقتاۋ ءۇشىن ارنايى جابدىقتارمەن قامتاماسىز ەتىلۋ كەرەك;
3. كىتاپحاناعا وقىرماندار سۇرانىسىن قاناعاتتاندىرۋ ءۇشىن جاڭا ۇلگىدەگى كومپيۋتەرلەر، كوشىرمە جاسايتىن اپپاراتتار الۋ كەرەك، وقۋ زالدارى كونديتسيونەرلەرمەن جابدىقتالۋ قاجەت;
4. وتكەن جىلداردا ورتالىق عىلىمي كىتاپحانانىڭ كىتاپقا جانە مەرزىمدى باسىلىمدارعا جازىلۋى ءۇشىن بولىنگەن قارجىنىڭ قايدا كەتكەنىن، قالاي جۇمسالعانىن قۇزىرلى ورگاندار تەكسەرۋى كەرەك. سونداي-اق، ورتالىق عىلىمي كىتاپحانا قورىنىڭ جاڭا عىلىمي باسىلىمدارمەن تولىعۋىن قامتاماسىز ەتۋ قاجەت;
5. ورتالىق عىلىمي كىتاپحانا قىزمەتكەرلەرىنىڭ جالاقىسى ءوسۋى ءتيىس. ولار دا باسقا كىتاپحانالاردىڭ قىزمەتكەرلەرىمەن دەڭگەيلەس جالاقى الۋى كەرەك.
