Жамбыл облысында бірнеше көлік соқтығысқан жол көлік оқиғасы салдарынан 25 адам зардап шекті, деп хабарлайды "Адырна" ұлттық порталы.
"31 қаңтар күні сағат 10.47 – де Жуалы ауданы Нұрлыкент ауылының маңында "Батыс Еуропа-Батыс Қытай" Республикалық маңызы бар автожолының 567 шақырымында ауа райының қолайсыздығына байланысты (көктайғақ, жол көрінісінің нашарлауы, боран) 26 автокөліктің (төрт жолаушылар автобусы, төрт жүк автомашинасы және жеңіл автомобильдер) қатысуымен жол-көлік оқиғасы орын алды. Оқиға салдарынан қаза тапқандар жоқ. Б. Момышұлы ауылының орталық аудандық ауруханасына 25 адам жеткізілді",-деп хабарлады Жамбыл облысы полиция департаментінің (ПД) баспасөз қызметі.
Деректерге сүйенсек, зардап шеккен 25 адамның төртеуі реанимацияда, олардың арасында балалар да бар.
"Тараздың 593-534 км-ге дейінгі автожолы екі бағытта да жабық. Оқиға орнында полиция қызметкерлері жұмыс істеуде, оқиғаның егжей-тегжейлері анықталады. Жамбыл облысының ПД Жол қозғалысы ережелерін қатаң сақтау қажеттігін еске салады, әсіресе ауа райы қолайсыз болған жағдайда жүргізушілерді сақ болуға шақырды", - деп толықтырды полиция қызметкерлері.
