Қарағандыдағы Арнаулы әлеуметтік қызмет көрсету орталығында балалардың жаппай улану оқиғасын облыстық прокуратура тергеп тексеруде, деп хабарлайды “Адырна” порталы.
Қылмыстық іс санитарлық нормаларды бұзу бабы бойынша тергелуде.
«Қарағанды облысының прокуратурасы «Арнаулы әлеуметтік қызмет көрсету орталығында» балалардың улануы бойынша Қылмыстық кодекстің 304-бабының 3-бөлігі «Санитарлық ережелерді немесе гигиеналық нормаларды бұзу» бойынша сотқа дейінгі тергеуді жүргізіп жатыр», - делінген хабарламада.
Қылмыстық кодекстің 304-бабының 3-бөлігінде үш жылға дейінгі мерзімге белгілі бір лауазымдарды атқару немесе белгілі бір қызметпен айналысу құқығынан шектей отырып, 5 жылдан 10 жылға дейін бас бостандығынан айыру жазасы көзделген. Бұл алдын алу шарасы, егер кінәлінің әрекеті екі немесе одан да көп адамның өліміне әкеп соқса, тағы қарастырылады.
«Қазіргі уақытта қылмыстық іс бойынша оқиғаның барлық мән-жайын жан-жақты, толық және объективті тергеуді қамтамасыз етуге бағытталған қажетті тергеу әрекеттері жүргізілуде», - деп қосты Бас прокуратура.
Естеріңізге сала кетейік, Қарағандыдағы «Арнаулы әлеуметтік қызмет көрсету орталығында» балалардың жаппай улануына себеп болған зат дәрі-дәрмек тізімімен салыстырылып тексерілді, бірақ анықтау мүмкін болмады. Бұл туралы бір күн бұрын Мәжіліс депутаты Ажар Сағандықова мәлім етті. Ол балалардың белгісіз заттан уланғанын еске алды. Қазір прокуратура балалардың нақты неден зардап шеккенін анықтап жатыр.
Ағымдағы жылдың тамыз айында аталмыш орталықтан 12 бала уланып, ауруханаға түскен. Одан кейін бір бала қайтыс болды, кейінірек орталықтың тағы бір тәрбиеленушісі ауруханада көз жұмды.
