Бүгін, 8 желтоқсанда Алматы сотында 2022 жылғы қаңтардағы тәртіпсіздіктер кезінде лауазымдық өкілеттіктерін асыра пайдаланды деп айыпталған Ұлттық қауіпсіздік комитетінің 11 қызметкеріне қатысты үкім шығарылды. Бұл туралы Азаттық жазды, деп хабарлайды «Адырна» тілшісі.
ҰҚК-ның бұрынғы жеті қызметкері үш жылдан бес жылға дейін бас бостандығынан айырылды. Тағы үшеуі шартты жаза алса, ал біреуі ақталып шықты.
Адвокат Гүлнар Жуаспаева соттың мұндай шешім шығарғанына наразы.
«Біріншіден, өте аз жаза берді. 3-5 жыл. Ең басты айыпталушы Жұмановты сот ақтады. Адамдарды ұрып-соғып, тепкілегендердің үшеуіне шартты жаза берді. Сот үкіміне келіспейміз. Оған шағым түсіреміз. Азаматтық шағымды ішінара ғана қанағаттандырды. Өтепбаеваның әйеліне моральдық шығын ретінде – 20 млн теңге, бірнеше адамға миллион теңге төленеді. Қалғандарының шағымы қанағаттандырылмады. Өте әділетсіз үкім! Жәбірленушілердің құқығын қорғаған маған қатысты жеке қаулы шығарды»,- деді ол.
