Mektep dárethanasynda sý joq ekenin aıtqan qyzmetker jumysynan qýyldy, dep habarlaıdy "Adyrna" tilshisi.
12 qazan kúni Aqtóbe oblysynyń ákimi Ashat Shaharov jumys saparymen Yrǵyz óńirine barǵan. Ol aımaqtaǵy áleýmettik nysandar qurylysymen tanysyp, Yrǵyzdaǵy aýyl mektepteri men problemalyq nysandardy aralady.
Nysandardyń birinde sý máselesi bolǵan eken. Ákim men oblystyq bilim berý mekemesiniń basshysyna 300 oryndyqty gımnazııada sýdyń joqtyǵyn aıtqan eden jýýshy áıel jumysynan aıyrylǵan.
“Mine, qarańyz, sý aǵyp turǵan joq”, – degen Móldir Ǵapyz sýdy aǵyzbaq bolady, alaıda sýdyń shynymen de joq ekenin basshylyq kóredi.
Alaıda birneshe ýaqyttan keıin shyndyqty aıtqany úshin qyzmetkerdi jumystan shyǵaryp jibergen.
Móldir Ǵapyz:
“Otbasymda men ǵana jumys isteımin. Anam – zeınetker, ulym – erekshe kútimdi qajet etetin bala. Biraq men memlekettik organdarda jumys isteı almaımyn, sebebi meni bap boıynsha jumystan shyǵaryp, balam týraly jeke málimetterim taratyldy”, – deıdi.
Alaıda basshylyq qyzmetkerdiń jumysyna salǵyrttyq tanytyp, eki kún ornynda bolmaǵanyn aıtady.
“Móldir Ǵapyz jalǵyzbasty ana, 6-synypta oqıtyn balasy bar, anasymen birge turady. Ol 13-14 qarasha aralyǵynda belgisiz sebeptermen eki kún jumysta bolmaǵan. Sondyqtan gımnazııa dırektory oǵan hat jazyp, poshta arqyly jiberdi. Qyzmetkerdiń jumys ornynda sebepsiz bolmaǵany, jumysqa jaýapsyz qaraǵany úshin gımnazııa dırektory G.Nurmanovaǵa tıisti zań aıasynda jumystan bosatý sharasy qoldanyldy”, – dep túsindiredi Yrǵyz aýdany ákiminiń orynbasary Aıbek Óksikbaev.
