Астана халықаралық форумы аясында Қазақстан Республикасының Денсаулық сақтау министрлігі Катардағы Power International Holding ірі холдингімен Астанада медициналық хаб салу жобасын іске асырудың негізгі қағидаттары туралы негіздемелік келісімге қол қойды. Жоба «KAZAKH INVEST» ҰК» АҚ қолдауымен жүзеге асырылады, деп хабарлайды "Адырна" ұлттық порталы forbes.kz-ке сілтеме көрсете отырып.
Астанадағы медициналық көпфункционалды хаб 300 төсекке есептелген және емхана, диагностикалық және оңалту бөлімдерін қамтиды. Жобаның құны 300 миллион долларды құрайды.
Катардағы екінші ірі жеке отбасылық конгломерат Power International Holding жылжымайтын мүлік, энергетика, телекоммуникациялар, қаржы, денсаулық сақтау және білім беруді қоса алғанда, әртүрлі салаларда жұмыс істейтін жетекші активтерді басқарушы болып табылады.
Холдингтің Катардан тыс жерлерде айтарлықтай капиталы мен активтері бар. Компанияның медициналық мекемелерді салу және пайдалану тәжірибесі бар, олардың арасында «The View» 250 төсек-орын және 100 000 шаршы метр ауданы бар Доха қаласындағы медициналық орталығын атап өткен жөн.
Катар компаниялар тобының төрағасы Моутаз әл-Хаят Қазақстан Республикасы Денсаулық сақтау министрлігімен ынтымақтастық холдинг үшін Орталық Азиядағы жаңа мүмкіндіктер ашатынын баса айтты.
«KAZAKH INVEST» ҰК» АҚ Investment Task Force тобының бөлімшесінің жоба жетекшісі Динара Исабекова ұлттық компанияның Power International Holding компаниясымен екі жылдан астам келіссөздер жүргізгенін атап өтті. Жоба денсаулық сақтау саласындағы ең ірі жобалардың біріне айналады және ел тұрғындары үшін медициналық қызметтердің сапасы мен қолжетімділігін арттырады.
Айта кету керек, жобаны жүзеге асыру екі елдің де экономикалық және сауда байланыстарын нығайтуға ұмтылысын растайды, сонымен қатар жоғары технологиялық медициналық инфрақұрылымды дамытуға ықпал етеді.
"Адырна" ұлттық порталы
