Президент Қасым-Жомарт Тоқаев елімізді алда ауқымды реформалар мен Жаңа Қазақстан құрылысы күтіп тұрғанын айтты. Мемлекет басшысы Алматыда Наурыз мерекесіне арналған құттықтау сөзінде Екінші Республика туралы айтты, деп хабарлайды "Адырна" ұлттық порталы.
Мемлекеттік хатшы Ерлан Қарин Тоқаевтың құттықтау сөзінде «Екінші Республика» деген сөздің нені білдіретінін түсіндірді.
Қарин «Екінші Республика» және «Жаңа Қазақстан» ұғымдарының мән-мағынасы бір, тек екпінімен ғана ерекшеленетінін атап өтті. Жаңа Қазақстан – жалпы ел болашағының бейнесі. Біз әлеуметтік құндылықтарды жаңартып, ұлттың жаңа сапасын қалыптастыру қажеттілігі туралы айтып отырмыз.
Тиісінше, бұл қаңтар оқиғасынан кейін немесе Жолдаудан кейін біз автоматты түрде Жаңа Қазақстанда тұра бастадық дегенді білдірмейді. Елбасы «Жаңа Қазақстан» тұжырымдамасын алға тарта отырып, таяу болашақта мемлекет құрудың жаңа мақсатын белгіледі. Жаңа Қазақстанның құрылысы бір сәтте, бір түнде болуы мүмкін емес. Бұл әлеуметтік трансформацияның терең және ұзақ процесі.
Ерлан Қарин
Қарин Тоқаевтың суперпрезиденттік басқару түрінен күшті парламенті бар президенттік республикаға түпкілікті көшу жөніндегі бастамаларын еске салды. Конституцияның 30-дан астам бабына және 20 заңға өзгерістер енгізіледі деп күтілуде.
Сондықтан, жалпы алғанда, мемлекеттік басқару моделінің өзгеруінің басталуы туралы ғана емес, мемлекеттік және қоғамдық даму парадигмасының өзгеруі туралы да айтуға болады. Ал бүгінде бұл процесті нақтырақ көрсету үшін президент «Екінші республика» деген терминді қолданды. Оның үстіне, Мемлекет басшысы алға қойған саяси реформаларды жүзеге асыру биылғы жылға жоспарланғандықтан, Екінші Республика қазірдің өзінде өте жақын және нақты мақсат болып табылады.
Ерлан Қарин
Мемлекеттік хатшы Жаңа Қазақстан – қоғам мен ұлттың жаңаруы, ал Екінші Республика – мемлекеттік үлгінің жаңаруы деп түйіндеді.
"Адырна" ұлттық порталы
