Алматыдағы Қазақ медициналық үздіксіз білім беру университеті (ҚазМҮББУ) өз жұмысын тоқтатты, - деп хабарлайды "Адырна" ұлттық порталы Білім және ғылым министрлігінің баспасөз қызметіне сілтеме жасап.
Хабарланғандай, ҚазМҮББУ студенттері басқа медициналық университеттерге ауыстырылды. Ауыстыру соңғы екі айда жүзеге асырылды, енді түлектер оқуын жалғастыра алады және бағдарламаны игерген жағдайда жоғары білім туралы дипломдар алады.
«ҚазМҮББУ-да шамамен 3500 адам оқыды. Студенттердің көпшілігі Алматы қаласындағы медициналық жоғары оқу орындарына ауыстырылды. Кейбіреулері оқуын Нұр-Сұлтан, Қарағанды, Семей, Ақтөбе, Шымкент және Түркістандағы медициналық университеттерде жалғастырады. Ауыстыру кезінде студенттер қабылдаушы университеттерге ҚазМҮББУ жіберген студенттерді қабылдау және оқу нәтижелерін бағалау кезіндегі заң бұзушылықтарды жою керек болды. Ауыстырылған 111 студенттің жеке істерінде оларға қажетті сертификаттар мен қосымшалар болған жоқ. Кейбір студенттерде ҰБТ сертификаттары болмады» деді Білім және ғылым министрлігі Білім және ғылым саласындағы сапаны қамтамасыз ету комитеті төрағасының орынбасары Гүлжан Жарасова.
Сонымен қатар, ҚазМҮББУ студенттерін басқа жоғары оқу орындарына ауыстыру кезінде кейбір магистранттар алғышарттардан өтпей оқыған болып шықты. Сонымен қатар, кейбір студенттер қабылдау кезінде талап етілетін тестілеудің кейбір элементтерінен өте алмады.
Сондай-ақ, ҚазМҮББУ магистранттары мемлекеттік стандарттың міндетті пәндерін толық көлемде оқымады. Бірқатар негізгі пәндер мүлдем игерілмеген. Мәселен, «Фармация» қысқартылған бағдарламасы бойынша оқыған студенттер белгіленген 120 кредиттің орнына тек 78-ін оқыды.
«Осы және басқа заң бұзушылықтар ҚазМҮББУ студенттерін басқа медициналық жоғары оқу орындарына ауыстыру процесін қиындатты. Бүгінгі күнге дейін бұл мәселелер шешілді, студенттер оқуын басқа университеттерде жалғастырады. Қабылдаушы университеттер студенттерге академиялық алшақтықты игеруге мүмкіндік берді. Олар студенттерге жетіспейтін құжаттарды қалпына келтіруге, оқудағы олқылықтарды жоюға және ағымдағы оқу жылын уақтылы аяқтауға көмектеспек», - деді Жарасова.
Естеріңізге сала кетейік, ақпанда ҚазМҮББУ бас лицензиясынан айырылды. Білім және ғылым министрлігі өткен жылдың ортасында университет қызметінде өрескел бұзушылықтар анықталғанын түсіндірді. Сәуір айында ҚазМҮББУ-ның бас лицензиясынан айыру туралы сот шешімі заңды күшіне енді.
"Адырна" ұлттық порталы
