Белгілі боксшы Бахтияр Артаев әріптесі, бауыры Қуат Хамитті қолдап, арнайы видеоүндеу жасады деп хабарлайды «Адырна» ұлттық порталы спортшының Инстаграм парақшасына сілтеме жасап.
«Кешеден бері интернет желісін шулатып жатқан ақпарат - Қуат Хамитовтың алты айға сотталғаны. Осыған байланысты Қуат бауырыммен хабарластым. Мән-жәйды білдім. Расында алты айға үй қамағына алынған екен. Осы тұрғыда менің азаматтық позициям: Ол менің бауырым, спортшы болғандықтан мен бұл жағдайда үндемей қалуым мүмкін емес. Біз демократиялық және зайырлы мемлекет болғаннан кейін өзінің ойын ашық жеткізе білу керек. Егер елім деген әр азаматтарымызды қамай берсек, еліміздің болашағы не болмақ? Сондықтан мен бұл шешім дұрыс емес деп есептеймін.
Керісінше, осындай елім дейтін спортшылар бар кезде оларды барынша қолдап, ел атын шығаруына атсалысудың орнына біз өкінішке орай оларды қамап жатырмыз. Осы тұрғыда бір-ақ нәрсе айтқым келеді. Мен мемлекет басшылығында отырған кісілерден әділ болып, осындай батырларымызды қолдауларыңызды сұраймын. Ал Қуат сияқты бауырларыма аман болыңдар, әрқашан ел атын шығара беріңдер. Біз сендермен бірге боламыз», - деді Артаев өзінің үндеуінде.
