Шымкентте бір айлық дәрі-дәрмек қоры бар

1106

Шымкент дәріханаларын тиісті дәрімен қамтамасыз ету мақсатында көрші елдерден дәрі шығаратын фарм компаниялармен 10 миллион АҚШ доллары болатын дәрі-дәрмек алуға келісімшарт жасалды.

Бұдан бөлек, қаладағы сегіз фармкомпанияға шетелден біржолғы тасымалмен дәрі әкелу бойынша рұқсат беріліп отыр. Қазіргі таңда Украина елінен дәрілердің алғашқы легі ұшақпен Алматыға келді. Енді жүк көлігімен Шымкентке жеткізіледі. Осылайша, қаладағы дәріге деген тапшылықты шешу жағы қарастырылып жатыр. Бұл туралы қала әкімінің бірінші орынбасары Ербол Садыр мәлімдеді.

Оның айтуынша, пневмония мен ЖРВИ-ға байланысты халық арасында сұранысқа ие «левофлоксацин» препаратының 1 млн 600 мың флаконы, 414 мың флакон «цефтриаксон», 100 мың қорап «дексаметазон» және 200 мың қорап «аскарбин қышқылы» сынды 20-дан аса қажетті дәрілерді алу бойынша келісімшарт жасалды.

Қазіргі кезде Шымкент қаласында тіркелген 560 дәріханада бір айлық дәрі-дәрмек қоры бар. Онда дене қызуын төмендететін препарат, вирусқа қарсы препараттар мен антибиотиктер және «С» дәрумендері бар.

Қала әкімінің бірінші орынбасары дәрі бағасын бақылау мақсатында құрылған төрт мониторингтік топтың  167 дәріханада болып, халық сұранысындағы дәрі-дәрмектердің қолжетімділігі мен бағасының тұрақтылығына зерделеу жұмыстарын жүргізгенін айтты. Нәтижесінде 50-ден аса жайт анықталып, оның 10-на қылмыстық іс қозғалған.

Шымкент 

Пікірлер
Редакция таңдауы