Өзге өңірлермен салыстырғанда Жамбыл облысы ауыл шаруашылық саласы жақсы дамыған. Әсіресе Әулиеата өңірі мал шаруашылығын дамытып, кәсіп бастауға таптырмайтын мекен.
блыс әкімдігінің ауыл шаруашылығы басқармасының басшысы Берік Нығмашевтың айтуынша, өңірде соңғы үш жылда шет елден 6 мыңға жуық мүйізді ірі қара сатып алынды. Бұл туралы облыста ет өнімін дамыту картасы әзірленген.
2018-2027 жылдар аралығында ет бағытына бағытталған 3 мың фермер шаруашылығы ұйымдастырылып, шетелден жалпы 36 мың бас мүйізді ірі қара сатып алу жоспарланып отыр. Осы шаралардың нәтижесінде өндірістік бордақылау алаңдарында өндірілетін сиыр еті 2,7 мың тоннадан 16,8 мың тоннаға, экспорт көлемі 2,5 мың тоннаға жеткізіледі. Аймақта мал басы саны артып келеді. Биылғы жылы облыстағы мүйізді ірі қара саны – 400,8 мың басты құрап, өткен жылмен салыстырғанда 4,1 пайызға өсті. «Сыбаға» бағдарламасы арқылы шетелден биыл жыл басынан бері 2 923 бас мүйізді ірі қара малы әкелінді. Нәтижесінде, асыл тұқымды мал басы артып, соңғы үш жылда шетелден 6 мыңға жуық МІҚ жеткізілді», - дейді Берік Нығмашев.
Басқарма басшысы осылардың негізінде облыста 5 репродуктор-шаруашылық құрылып, облыста асыл тұқымды МІҚ малының жалпы пададағы үлес салмағы – 26 пайызды құрап, республикада алдыңғы қатардан көрінгендігін тілге тиек етті. Сондай-ақ, «Ырыс» бағдарламасы бойынша заманауи 2 сүт тауарлы фермасы құрылып, қазіргі уақытты Байзақ ауданындағы «Ақжар» және Жамбыл ауданындағы «Бірлік» шаруа қожалықтары игілігін көріп жатыр.
«Ағымдағы жылы 1500 тонна сиыр және 2000 тонна қой етін экспорттау жоспарланса, жыл басынан 2106,8 тонна ет Иран, Бахрейн, Катарға, Біріккен Араб Әмірліктері және Ресей, Өзбекстан, Қырғызстан елдеріне экспортталды. Оның 1127,7 тоннасы сиыр, 979,1 тоннасы қой еті. Облыста сыйымдылығы 27,0 мың басты құрайтын, 11 ірі бордақылау алаңдары жұмыс істейді. Бүгінгі күні бұл алаңдарда 3 523 бас бұқашық бордақылануда», - деді басқарма басшысы.
Жалпы «Сыбаға» және «Ырыс» бағдарламаларының арқасында Жамбыл облысында ауыл шаруашылығы дамып, кәсіпкерлерге зор қолдау жасалып отыр.
«АДЫРНА»
ұлттық порталы
