Aqtóbe oblysynyń Oıyl aýdanyndaǵy ýaqytsha ótkeldi qarǵyn sý shaıyp ketti. Qazirgi ýaqytta ótkeldi qalpyna keltirý jumystary júrip jatyr, dep habarlaıdy "Adyrna" ulttyq portaly.
Byltyr kóktemgi sý tasqyny kezinde Oıylǵa kireberis negizgi kópir buzylyp, ýaqytsha ótkel salynǵan edi. Alaıda qar sýynyń kóterilýine baılanysty ótkeldi sý basty.
Oıyl aýdany ákimdiginiń málimetinshe, ótkeldi jóndeý jumystary júrgizilýde. Bir táýliktiń ishinde kólik qozǵalysy qaıta jandanýy tıis. Qazirgi ýaqytta turǵyndardyń ózen arqyly ótýine jaǵdaı jasalyp jatyr.
Oıyl aýdanynyń ákimi Asqar Qazybaev ózen deńgeıiniń kóterilgenin rastady.
Eske sala keteıik, Aqtóbe oblysynda sý shaıǵan kópirler men joldardy jóndeýge 15 mlrd teńgeden astam qarajat qajet. Onyń ishinde Oıyl aýdanyna kireberis negizgi kópirdi qalpyna keltirýge 4 mlrd teńgege jýyq qarjy bólinbek.
