АҚШ вице-президенті Джей Ди Вэнс Америка әскерін Украинаға жіберу мүмкіндігін жоққа шығарды. Бұл туралы ол 14 ақпан күні әлеуметтік желіде жазды, деп хабарлайды “Адырна” ұлттық порталы.
“Президент Трамп - әлемдегі ең үлкен келісім жасаушы және ол Украинадағы соғысты тоқтату арқылы аймаққа бейбітшілік әкеледі. Біз әрдайым айтқанымыздай, Америка әскерлері ешқашан америкалық мүдделер мен қауіпсіздікке үлес қоспайтын жерлерде қауіпке ұшырамауы тиіс. Бұл соғыс Ресей мен Украина арасында жүріп жатыр», – деді Джей Ди Вэнс.
Сонымен, Вэнс The Wall Street Journal (WSJ) басылымында жарияланған сұхбатын жоққа шығарды. Онда ол егер Ресей Украинамен бейбіт келісім жасауға келіспесе, АҚШ Мәскеуге қарсы жаңа санкциялар енгізіп, тіпті америкалық әскерді Украинаға жіберуі мүмкін екендігі айтылған еді. WSJ журналистері Вэнстің «Ресейге қарсы экономикалық және әскери ықпал ету құралдары бар» деген сөздерін келтірген.
«WSJ менің сөздерімді осылай бұрмалап жазғаны абсурд, бірақ таңқаларлық емес, өйткені олар жылдар бойы қажетсіз түрде америкалық әскерлерді шетелге жіберуді қолдады», – деп жауап берді Вэнс WSJ жариялаған мақалағда.
Америкалық вице-президенттің айтуынша, АҚШ билігі Владимир Путинді Ресей ұрыс даласынан гөрі келіссөз үстелінде көп нәрсеге қол жеткізе алатынына сендіруді көздеп отыр. Вэнс сондай-ақ бейбіт келіссөздер сәтті өткен жағдайда Вашингтон мен Мәскеу арасындағы қарым-қатынас қайта қалпына келуі мүмкін екенін айтты.
Саясаткер бұған дейін АҚШ президенті Дональд Трамп жариялаған Украинадағы қақтығыстарды тоқтату туралы жоспарланған келісім «көптеген адамды таң қалдырады» деп атап өтті. Сонымен бірге ол келіссөз барысында Трамптың белгілі бір мәселелер бойынша пікірін өзгертуі мүмкін екенін атап өтті.
Бір күн бұрын Пентагон басшысы Пит Хегсет Украинаға америкалық әскерді орналастыру мүмкіндігін жоққа шығарды. Ол сондай-ақ Украинаны 2014 жылғы шекараға қайтару шындыққа жанаспайтын мақсат екенін атап өтті.
