Шамалған. Апаттан кейін көпір салынатын болды

243

Қазақстанның индустрия және инфрақұрылымдық даму министрі Роман Скляр Алматы-Шамалған өткеліне жақын жерде көпір салынатынын мәлімдеді.

Орталық коммуникациялар қызметінің брифингінде Роман Скляр көпірдің жобалануы мен құрылысын келесі жылы бастау жоспарланып отырғанын айтты.

"Біз өткелде көпір салуды келесі жылға жоспарлап отырмыз. Бірақ, көпір дәл осы өткелде емес, жер үйлер азырақ сүрілетін аумақта салынады. Құрылыс орнын түбегейлі анықтау керек", - деді Скляр.

Сонымен қатар индустрия министрі қайғылы жағдай орын алған жерде көпір салу мүмкін еместігін айтты. Себебі онда тұрғын үйлер көп, көпір салған жағдайда оларды сүру керек болады.

Министр дәл сол аумақта көпір салу үшін сол жердегі 70-ке тарта жеке үйді, 2 жанар-жағармай бекетін сүру керек екенін, бұл үлкен бюджеттік шығын екенін атап өтті.

«Алайда дәл осы жерде, дәл сол өткелде салынбайды. Одан сәл қашықтау жерде салынатын болады», - дейді министр.

Еске сала кетсек, күні кеше Шамалған бекетінде пойыз бен автобус соқтығысып қалды. Оқиға орнында бір адам қаза тауып, тоғыз адам жарақаттанды. Олардың екеуі - бала, біреуі - әйел адам.

 

 

Пікірлер