Атырау қаласының тұрғындары бірнеше күннен бері үйлерінен шыға алмай отыр. Мұнда соңғы бір аптада ауа ластанып, жағымсыз иістен жұрттың мазасы қашқан, деп хабарлайды “Адырна” ұлттық порталы AtyrauPress-ке сілтеме жасап.
«Атырау тұрғындары үшінші күн қатарынан шіріген жұмыртқаның иісіне ұқсас жағымсыз иіспен тыныс алып отыр. Желдің бағытын ескере отырып, иіс мелиоративтік жұмыстар жүргізіліп жатқан «Квадрат» бағытынан шыққаны белгілі болды», - деп хабарлайды жергілікті басылым.
Онда ауадағы күкіртті сутегінің бірнеше есе артық мөлшері тіркелді. Шағала, Маяк, Жилгородок аудандарында артықшылықтар табылмады.
«Мелиорация кезінде қазу жұмыстары жүріп, ауаға көп нәрсе тараған. Соның салдарынан күкіртті сутегінің иісі де күшейіп кеткен болу керек. Кеше сағат 10-да күкіртсутегі көрсеткіші 0,22 максимумды көрсетті, негізі норма 0,0008 болды. Бұл нормадан ондаған есе асып, тұрғындардың денсаулығына зиянын тигізуде. Жергілікті атқарушы орган Экология және табиғи ресурстар министрлігімен бірлесіп, бұл мәселені шешу және булану тоғанының алаңын қалпына келтіру үшін жол картасына қол қойды. Дәл осы алаңда жаңа СҚС құрылысы жүріп жатыр», - деді Атырау облысы бойынша экология департаменті басшысының міндетін атқарушы Ерлан Есенов.
Мәліметтерге сәйкес, жыл басынан бері қаладағы ірі және ұсақ кәсіпорындарға 20-дан астам тексеру жүргізіліп, 13 миллиард теңге айыппұл салынған. Айыппұлдар «Каспиймұнай» АҚ, «Атаким» және т.б. салынды.
Осылайша, медициналық қалдықтарды кәдеге жарататын «Атаким» серіктестігі сүзгісіз жұмыс жүргізген. Есеновтың айтуынша, қазір бұл кәсіпорынның қызметін тоқтату үшін сотта сот процесі жүріп жатыр.
