Мемлекет басшысы Қасым-Жомарт Тоқаев премьер-министр Олжас Бектеновтің су тасқынының салдарын жою және зардап шеккендерге көмек көрсету жұмыстары туралы есебін тыңдады. Бұл туралы бүгін, 18 мамырда Ақорданың баспасөз қызметі жазды, деп хабарлайды «Адырна» тілшісі.
Президент бұл бағыттағы шараларды күшейтуге, зардап шеккен тұрғындарды сапалы баспанамен қамтамасыз етуге, қалалар мен елді мекендердегі инфрақұрылымдарды жөндеуге және құрылыс жұмыстарына кірісуге қатысты тапсырма берді.
Қасым-Жомарт Тоқаевтың айтуынша, жергілікті атқарушы органдардың басшылары халықпен етене әрі тиімді жұмыс істеуге міндетті. Сондай-ақ туындаған мәселелерді шешу және жұртшылықтың орынды талап-тілегін орындау жөніндегі мемлекеттік саясат пен қабылданып жатқан шараларды нақты түсіндіруге тиіс.
Сонымен қатар Үкімет, әкімдіктер құқық қорғау органдарымен бірлесіп, заңға сәйкес қоғамдық тәртіпті қамтамасыз етуі керек.
