ۇكىمەت جەزقازعان قالاسىنىڭ باس جوسپارىن ماقۇلدادى، دەپ حابارلايدى "ادىرنا" ءتىلشىسى.
ۇلىتاۋ وبلىسىنىڭ اكىمى بەرىك ابدىعاليۇلى قر پرەمەر-ءمينيسترى ءا.ا.سمايىلوۆقا جەزقازعان قالاسىنىڭ باس جوسپارىن تانىستىردى. ناتيجەسىندە، ۇكىمەت وتىرىسىندا ۇلىتاۋ وبلىسى ورتالىعىنىڭ باستى قۇجاتى ماقۇلداندى.
جەزقازعان قالاسى – ۇلىتاۋ وبلىسىنىڭ ورتالىعى مارتەبەسىنە يە بولعاننان كەيىن، جاڭا وبەكت سانىن كوبەيتۋ قاجەتتىگى تۋىنداعان سوڭ باس جوسپارعا تۇزەتۋلەر ەنگىزۋ بىلتىر قولعا الىنعان بولاتىن.
ايتا كەتەيىك، جەزقازعاننىڭ باس جوسپارى وسى ۋاقىتقا دەيىن ءۇش رەت قوعامدىق تالقىلاۋدان ءوتىپ، تۇرعىنداردىڭ پىكىرىن ەسكەرە وتىرىپ، مەملەكەتتىك ورگانداردىڭ ماقۇلداۋىمەن، قالا قۇرىلىسى ساراپتاماسىنان وتكەن سوڭ ازىرلەندى.
انىقتاما ءۇشىن: باس جوسپاردا جاڭا جول قۇرىلىمى، تۇرعىن ۇيلەر، سپورت سارايلارى، تەاتر، ستاديون، ساۋدا، ويىن-ساۋىق ورتالىقتارى، اسكەري قالاشىق، ءورت ءسوندىرۋ دەپوسى، ءجۇزۋ باسسەينى جانە 29 بالاباقشا، 8 مەكتەپ، 3 وبلىستىق، 4 قالالىق اۋرۋحانا، بالالاردى وڭالتۋ، ونكولوگيالىق ورتالىق قاراستىرىلعان.
قازىرگى قولدانىستاعى باستى قۇجات 117 مىڭ تۇرعىنعا جوسپارلانعان بولسا، قابىلدانۋى قاجەت باس جوسپار 145 مىڭ تۇرعىنعا شاقتالىپ وتىر.
الداعى ءۇش ايدا قالا اكىمدىگىمەن بىرگە باس جوسپار بويىنشا جەر ءبولىنىپ، ينۆەستورلار ءوز جوبالارىن جۇزەگە اسىرۋ ءۇشىن بولىنگەن جەرلەر اۋكتسيونعا قويىلاتىن بولادى.
جەزقازعان قالاسىنىڭ باس جوسپارى – وبلىستى دامىتۋدىڭ نەگىزگى قۇجاتى. ول - قالادا قۇرىلىس جۇمىستارىن جۇرگىزۋگە جانە قابىلەتتى ينۆەستورلاردىڭ جوبالارىن جۇزەگە اسىرۋعا، قالانى قۇرۋ جانە ودان ءارى دامىتۋعا مۇمكىندىك بەرەدى.
