Атырауда мұнай қалдығы бар теміржол цистернасы жарылды. Бұл туралы облыстық төтенше жағдайлар департаменті айтты, деп хабарлайды «Адырна» тілшісі.
Оқыс оқиға 14 желтоқсанда жергілікті уақытпен сағат 13:58 шамасында болған.
«Атырау қаласындағы оңтүстік өндірістік аймақта орналасқан «Batys Petroleum» ЖШС-не тиесілі №1 цехтың жуу-булау станциясында жылжымалы темір жол құрамына тазалау жүргізілді. Сол кезде мұнай шламының қалдығы бар цистернада газ-ауа қоспасының дүмпуі болды. Салдарынан цех құрылымы ішінара құлады. Жалынның тұтануына байланысты автоматты өрт сөндіру құрылғысы іске қосылды. «Семсер-Өрт сөндіруші» ЖШС өрт сөндіру бөлімшелері өрт сөндіру жұмыстарын жүргізді»,—делінген хабарламада.
Оқиға орнына Атырау облысы Төтенше жағдайлар департаментінен 48 қызметкер мен 5 бірлік техника, «Апаттар медицинасы орталығын» 3 қызметкер 1 бірлік техника, «Семсер-Өрт сөндіруші» ЖШС 5 адам 1 бірлік техника жұмылдырылды. Зардап шеккендер жоқ.
