19 шілдеде «Отбасы» банкі «Ұмай» әйелдер ипотекасына өтініш қабылдауды жалғастырады. Бұл бағдарламаны пайдаланып, Астана, Алматы, Ақтау және Атыраудан басқа Қазақстанның кез келген қаласында баспана сатып алуға болады. Бұл қалаларда пәтер сатып алу лимиті таусылған, сондықтан «Ұмай» бағдарламасына қатысушылар бұл жерден шаршы метрді сатып ала алмайды, деп хабарлайды "Адырна" порталы.
«Ұмай» тұрғын үйді несиелендіру бағдарламасы Қазақстанда үшінші жыл жұмыс істейді. Бұл «Отбасы» банкі мен Азия даму банкінің (АДБ) бірлескен жобасы. Биыл үшінші транш аясында оны жүзеге асыруға 15,6 млрд теңге бөлінді. Өтінімдерді қабылдау 2023 жылдың 10 мамырында бастала салып, сол күні түстен кейін бөлінген ақшаның лимиті таусылды.
Жалпы, бұл күні банк 15,6 млрд теңге сомаға 1000-ға жуық өтінішті қабылдады.
«Бағдарламаға қатысуға өтініш берген кезде клиент тұрғын үйді сатып алудың болжамды сомасына несиеге алдын ала мақұлдау сертификатын алады. Бұл сома бірден клиент үшін сақталады. Бұл сертификат бір айға жарамды. Осы уақыт ішінде клиент баспана тауып, оны бағалап, төлем қабілеттілігін растап, несие алуға өтініш беруі керек», - деп түсіндірді «Отбасы банкі».
Бірақ барлық клиенттер сертификаттарын уақытында пайдаланбады. Бір айдан кейін көбінде «күйіп кетті». Кейбір клиенттер пәтерді сатып алуды кейінге қалдыруды шешіп, өз ойын өзгерткен немесе лайықты пәтер таппаған болуы мүмкін. Бұл ретте біреулер үшін бір ай бойы жарамды болған қаражат құрдымға кетсе, ал қалғандары оны пайдаланып, өз баспанасын сатып алып үлгерді.
Мәселен, биылғы жылы берілген өтініштердің ішінде 400-ге жуық клиент сертификатты уақытында пайдаланбаған немесе өтініштерін мүлде жойған.
Десе де, сол уақытта «Ұмай» бағдарламасының 570 қатысушысы лайықты баспана тауып, несие беріп, қоныс тойын тойлап үлгерді. Тағы 32 өтінім қарастырылуда. Бұл оларға жақын арада несие беріліп, жаңа баспана иелерінің қатары көбейеді деген сөз.
«Әйелдерді баспанамен қамтамасыз ету бағдарламасы бойынша кейбір клиенттер несиені пайдаланбағандықтан, банкте үшінші транштан «бос» 8 млрд теңге қалған. Сондықтан байланыс орталығының операторлары банк сайтында бұрын «Ұмай» бағдарламасына қатысуға өтінім қалдырған, бірақ қатысушылар пулына кіруге үлгермеген клиенттерге телефон соққан. Нәтижесінде жалпы несие сомасы 2 млрд теңгеге тағы 188 адам таңдалды», - деп түсіндірді Отбасы банкі.
«Отбасы банк» менеджерлері қоңырау шалған бақытты жандардың бірі – Қарағанды қаласының тұрғыны Іңкәр Әлмағамбетова. Ол мұғалім болып жұмыс істейді, күйеуімен бірге екі бала тәрбиелеп отыр. «Ұмай» бағдарламасы бойынша аталған отбасы үш бөлмелі пәтер сатып алды. Тұрғын үй мектепке жақын орналасқан, бұл балаларға өте ыңғайлы.
«Біз 10 мамырда «Ұмай» бағдарламасына қатысуға өтінім бердік, бірақ бізге барлық қаражат жұмсалып кеткенін хабарлады. Кейіннен бізге банктен қоңырау шалып, бағдарламаға қатыса алатынымызды хабарлады. Басында біз сенбедік, өйткені қазір алаяқтар көп. Ал мен «Отбасы банкіне» өзім телефон соққанда, бұл ақпарат расталды, әрине, қуанышымызда шек болмады», - деп бөлісті Іңкәр Әлмағамбетова.
Әйел адам банктен несие бойынша мақұлдаманы тез алғанын, содан кейін олар да тез арада лайықты пәтер тапқанын айтты.
«Бағдарлама маған қатты ұнады, өйткені бастапқы жарна онша үлкен емес. Сонымен қатар, басқа банктермен салыстырғанда жылдық мөлшерлеме қолайлы», - деп қосты ол.
Енді «Ұмай» бағдарламасына қосымша 400-450 қазақстандық қыз-келіншектер тағы да қатысуға мүмкіндік алады. 2023 жылдың 13 мамырындағы жағдай бойынша бөлінген үшінші транш аясында банкте тағы 6 млрд теңге қалды. Сондықтан әйелдер бағдарламасына қатысуға өтініштерді қабылдауды 2023 жылдың 19 шілдесінде сағат 9:00-де қайта бастау туралы шешім қабылданды.
"Қазақстандық әйелдердің ойланып, мүмкіндіктерін саралап, шешім қабылдауға уақыты бар. "Отбасы банкінің" кез келген бөлімшесіне жүгініп, несиеге алдын ала келісімді бірден алуға болады. Астана, Алматы, Ақтау және Атырау қалаларын қоспағанда, елдегі кез келген қаладан баспана сатып алуға болатынын білу маңызды. Бұл қалаларда тұрғын үй сатып алуға лимит таусылған, - деп еске салды «Отбасы» банкі.
Азия даму банкінің шарттары бойынша Астана, Алматы, Ақтау және Атырау қалаларында тұрғын үй сатып алуға берілген несиелердің жалпы санының 40 пайызынан аспайтын лимит белгіленді. Ал бүгінде бұл қалаларда жылжымайтын мүлік сатып алуға қажетті несиелер саны берілген.
Несиенің қалған 60 пайызы облыс орталықтары мен шағын қалалардан шаршы метр сатып алуға берілуі керек. Бұл өңірлерде тұратын әйел адамдарды қолдау және несиелеуде диспропорцияны болдырмау мақсатында жасалды.
«Ұмай» бағдарламасы бойынша сатып алынатын баспананың шекті құны 30 миллион теңгеден аспауы тиіс. Осы жылы пайыздық мөлшерлеме 14,4%-ды (ЖТСМ 15,4%-дан) құрады, кейіннен 3,5%-5%-ға дейін төмендеді (ЖТСМ 3,6%-дан).
Ипотекалық несиенің мерзімі 6 айдан 25 жылға дейін. Бұл ретте баспана таңдауда ешқандай шектеулер жоқ. Несиелер қайталама нарықтан тұрғын үй сатып алуға да беріледі, соның ішінде үлестік қатысу шарты бойынша да алуға болады. Сондай-ақ, бағдарлама бойынша пәтерді жөндеу жұмыстары үшін 3,7 млн теңгеге дейін несие ала аласыз.
«Әлеуетті қарыз алушының отбасының айлық табысы 550 мың теңгеден аспайтын болса, онда ол «Ұмай» бағдарламасы бойынша 15 пайыздық бастапқы жарнаны төлеу арқылы несие ала алады. Кіріс 550 мың теңгеден 640 мың теңгеге дейін болса, баспана құнының 20 пайызын төлеп несие алуға болады», - деп «Отбасы банкі» бағдарламаның шарттарын еске салды.
Ынтымақтастық барысында АДБ гендерлік жобаға 38 млрд теңге бөлді. Әйелдер бағдарламасы іске қосылған 2021 жылы, бірінші транш аясында 954 қазақстандық әйел жалпы көлемі 8,4 миллиард теңге несие ала алды. 2022 жылы 14 млрд теңге бөлініп, Отбасы банкінің тағы 1 119 нәзік жанды клиенттері тұрғын үй сатып алып, қоныс тойын тойлады.
"Адырна" ұлттық порталы
