Елімізде 4 пайыздық автонесие бағдарламасы тоқтатылады. Бұл туралы Индустрия және инфрақұрылымдық даму министрі Марат Қарабаев мәлімдеді, деп хабарлайды «Адырна» тілшісі.
Айтуынша, қазіргі кезде автокөліктің ең сұранысқа ие түрі – автобус.
«4 пайыздық автонесие бағдарламасын қайта жаңартуды жоспарлап отырмыз. Авкөліктерді несиелеу бағытын автобустарды несиелеуге ауыстырмақшымыз. Бүкіл республика бойынша 10525 автобус бар. Олардың көпшілігі тозған. Қоғамдық көлікті күнделікті 9,3 миллион қазақстандық пайдаланады. Біз олардың қажеттіліктеріне басымдық бермекпіз»,—деді министр.
Сондай-ақ Марат Қарабаев бағдарлама шарттарының өзгеруі жеңіл көліктертің қымбаттауына әсер етпейтінін атап өтті.
«Бұл жеңіл көлік қымбаттайды деген сөз емес. Қазақстандықтар көлікті нарықтық ставкамен ала алады. Яғни, өндірушілердің не банктердің бағдарламасын қолдануға болады»,—деді ол.
Айта кетейік, жеңілдетілген автонесие өткен жылы мамыр айында берілген еді. Оның екінші толқыны биыл ақпанда online қабылданды. 18 секундта 761 адам ғана тіркеліп, платформа халықтың сынына ұшырады.
