Қарағанды мен Павлодар облыстары шектесетін тұста Төрткөл, Қызылтау, Сатпай ауылының шөп шабар орындары үш күн бойы өртенген. Өрт 7 қыркүйек түнде тоқтады. Бұхар жырау ауданындағы Белағаш орман қожалығы, Ақөре, Семізбұғы деген жерлер түгел жанып кетті, деп хабарлайды “Адырна” ұлттық порталы.
Өртті сөндіру үшін бес-алты өрт сөндіру машинасы, 200 адамдай еріктілер жұмылдырылды. Қалың өрттің ортасында Баянауыл ауданының әкімі де жүріпті.
Ауыл тұрғындарының айтуынша сол күндері желдің соғысы жылдам болған. Алайда оған қарамастан, 40 жылдық, Жаяу Мұса, Қаныш Сәтбаев, Мұрымтал, Теңдік ауылдарынан еріктілер жұмылып, өрт сөндіріпті. Ауыл әйелдері тамақ әзірлеп, еріктілерді қолдаған. Жедел жердем көліктері де оқиға орнынан алыстамады.
”Адырна” ұлттық порталы
