Қоғамдық денсаулық сақтау ұлттық орталығының дерегінше, қазақстандықтардың 20 %-ы семіздікке шалдыққан. Мұндай семіздіктің бір салдары - етті шектеусіз жеу дейді нутрициолог, Қазақ тағамдану академиясының президенті Төрегелді Шарманов.
“Ет жеу осы екен деп шектеусіз, таңдаусыз кез келген етті пайдалана беру денсаулығымызды нашарлатпаса, нығайтпайды. Рас, ата-бабамыздың табағы еттен, мұрты майдан ажырамаған дерсіз. Бірақ ата-бабамыздың өмір сүру салты қандай еді? Ертелі-кеш шаруаның соңында жүрді емес пе?”, - деп жазды Қазақ тағамтану академиясының президенті өзінің Facebook парақшасына.
Ғалымның айтуынша, кеңсе жұмысы, техика мен технология заманында астың қорытылуы қиын.
“Ал бүгінгі ұрпақтың өмір сүру салты қандай? Қазіргі заман қимыл-қозғалысы аз кеңсе жұмысы, техника мен технология заманы ғой. Тіпті жаяу жүретін жұрт жоқ. Жегеніңіз қай кезде қорытылып, қай кезде ағзаңызға сіңеді? Осыдан семіздік, атеросклероз сынды аурулар белең алып барады”,- делінген жазбада.
“Адырна” ұлттық порталы
