Мырзахметов «Қараалманың» құрылысын 1-2 айда аяқтауды тапсырды

2150

Бүгін Жамбыл облысы әкімі Асқар Мырзахметов Жуалы ауданына жұмыс сапарымен барып, «Қараалма» тау шаңғы базасының құрылысымен танысты.

Бүгінде тау шаңғы базасының құрылыс жұмыстары 85 пайызы аяқталған.  Қонақ үй-котедждері, туристерге қызмет көрсету сервистік кешенінің құрылысы  салынуда. Сондай-ақ, жеті шақырымдық жол салынып, инфрақұрылым тарту жұмыстары аяқталған. Керек құрал-жабдықтардың дені  жеткізілген.  Құрылыс  басында 100-ден астам жұмысшы ауа-райының қолайсыздығына қарамастан, күн-түн демей білек-сыбана еңбектенуде.

Айта кету керек, мұнда  демалыс кешенінде қонақтар жыл он екі ай бойы демалуға мүмкіндік алады. Жаз мезгілдерінде саумалмен, қымызбен емдейтін, атпен серуен құратын орындар ашылады деп күтілуде.

Жалпы, нысан мемлекеттік-жекеменшік әріптестік негізінде салынуда. Жобаның жалпы құны – 4 миллиард теңге. Туристік нысан «Батыс Еуропа-Батыс Қытай» күрежолының бойынан 7 шақырым қашықтықта, Алатау тауының баурайында теңіз деңгейінен 1600 метр биіктікте бой көтеруде. Сонымен қатар, Алатау тауының ұшар басынан кешенге дейін 2 500 метр сырғанау жолағы түсуде. Сол сияқты 2050 және 350 метрлік аспалы жолдардың құрылыстары да жүзеге асырылуда. Аспалы жол құрылысына қажетті қондырғылар Австрия елінен жеткізілген.

Асқар Исабекұлы жауаптыларға  мұндағы  барлық жұмыстарды сапалы атқаруды, 350 метрлік аспалы жолдың  монтаждау, орнату шараларын ағымдағы жылдың 16 желтоқсанға дейін аяқтауды тапсырды. Ал, ұзындығы 2 мың метрден асатын  аспалы жолдың құрылысын бір-екі айда толығымен бітіру керектігін ескертті.

Мамандар «Қараалма» тау-шаңғы кешені облыстың экономикалық дамуына оң әсер ететінін айтады. Себебі Шымкент қаласы мен Түркістан облысының тұрғындарына Жуалы ауданы жақын. Сондықтан да олар Алматыдағы Шымбұлақ тау-шаңғы кешеніне сабылмай, іргедегі Қараалма кешеніне келуі мүмкін. Сондай-ақ Жамбыл облысының тұрғындары да осында келіп, бір сәт демалып кете алатын болады. Бір сөзбен айтқанда, Жамбыл облысынан мұндай кешеннің салынуы облыс үшін ғана емес, сонымен қатар еліміз үшінде өте маңызды шара болмақ.

«АДЫРНА»

ұлттық порталы

Пікірлер
Редакция таңдауы
Серіктестер/Партнеры
Студия IMA - создание сайтов Доставка цветов Астана - Lova Buket