Патриотизм – Отанға деген сүйіспеншілік, елдің дамуына үлес қосуға деген ұмтылыс. Ол жай ғана сөз емес, нақты іс-әрекеттермен көрінуі керек. Патриот болу – туған жеріңді, тіліңді, мәдениетіңді құрметтеу, мемлекетіңнің гүлденуі үшін аянбай еңбек ету дегенді білдіреді. Патриотизм, бірлік пен тұрақтылық құндылықтар – елдің ауызбіршілігі мен елдігіне тікелей әсер етеді. Белсенді Айдос Ермекұлымен тілдесіп, патриотизм туралы әңгіме өрбіттік.
- Айдос мырза, патриотизм дегеніміз не және оның маңыздылығы қандай?
- Патриотизм – өз Отаныңды сүю, елдің дамуына үлес қосуға ұмтылу және оның игілігі үшін еңбек ету. Бұл тек сөз жүзіндегі ұран емес, нақты іс-әрекетпен көрініс табатын қасиет. Қазақстанда патриотизм – маңызды құндылықтардың бірі. Біз көпұлтты мемлекетпіз, сондықтан әрбір азамат еліміздің тұрақтылығы мен дамуына өз үлесін қосуы тиіс.
- Бүгінгі таңда патриотизм қандай әрекеттер арқылы көрінеді деп ойлайсыз?
- Патриотизмнің көріністері әртүрлі болуы мүмкін. Біреулер Отан алдындағы борышын өтеп, елді қорғап, әскери қызметте жүрсе, енді біреулер білім алып, елдің экономикасы мен мәдениетінің дамуына үлес қосады. Мысалы, мұғалімдер мен дәрігерлер өз қызметін адал атқарса, бұл да патриотизмнің көрінісі. Ең бастысы – өз еліңе пайдалы болуға ұмтылу.
- Қазақстанның басты ұстанымдарының бірі – бірлік пен тұрақтылық. Бұл құндылықтардың еліміз үшін маңыздылығы қандай?
- Бірлік – біздің басты байлығымыз. Қазақстанда 100-ден астам ұлт пен ұлыс өкілдері бейбітшілік пен келісімде өмір сүріп келеді. Елдің дамуы үшін халықтың бірлігі қажет. Егер қоғамда алауыздық пен тұрақсыздық болса, экономикалық және әлеуметтік өсім баяулайды. Біз мұны әлемнің әртүрлі елдерінде болып жатқан оқиғалардан көріп отырмыз.
- Қоғамдағы бірлікті нығайту үшін не істеу керек?
- Бірінші кезекте, біз жастарға дұрыс тәрбие беруіміз қажет. Ұлттық құндылықтарды насихаттап, толеранттылық пен өзара сыйластықты дамытуымыз керек. Әрбір азамат өзінің этникалық немесе діни ерекшелігіне қарамастан, Қазақстанның толыққанды мүшесі екенін сезінуі тиіс.
- Мемлекеттік рәміздер – еліміздің тәуелсіздігі мен егемендігінің басты символдары. Қазіргі таңда Қазақстан Республикасының Мемлекеттік рәміздеріне деген құрмет қаншалықты деңгейде?
- Менің ойымша, соңғы жылдары бұл бағытта оң өзгерістер бар. Азаматтарымыз Мемлекеттік Ту, Елтаңба және Әнұранға үлкен құрметпен қарай бастады. Әсіресе, спортшыларымыз халықаралық жарыстарда жеңіске жеткенде, Әнұранымыздың орындалуы ерекше мақтаныш сезімін тудырады. Дегенмен, әлі де Мемлекеттік рәміздерге құрмет көрсетуді арттыра түсу қажет.
- Бұл тұрғыда қандай шаралар қабылдануы керек деп ойлайсыз?
- Ең алдымен, білім беру жүйесінде патриоттық тәрбиеге баса назар аудару керек. Оқушыларға Мемлекеттік рәміздердің маңыздылығын түсіндіру үшін арнайы сабақтар, кездесулер ұйымдастырған жөн. Сонымен қатар, Туымызды тек ресми мерекелерде ғана емес, күнделікті өмірде де көбірек қолдану қажет. Бұл – азаматтық сана мен патриотизмді арттырудың бір жолы.
- Соңғы сұрақ, сіздің ойыңызша, әрбір қазақстандықтың бойында қандай қасиеттер болуы керек?
- Әрбір қазақстандық Отанға деген сүйіспеншілікті, бірлік пен татулықты, еңбекқорлықты және Мемлекеттік рәміздерге деген құрметті бойына сіңіруі керек. Егер біз осы құндылықтарды ұстансақ, Қазақстан болашақта дамыған, қуатты елге айналады.
