Алматыда көпқабатты үйдің ауласында тұрған көліктердің үстіне шіріген ағаш құлап, көліктер бүлінді, деп хабарлайды “Адырна” ұлттық порталы КТК арнасына сілтеме жасап.
Үш автокөлік бүлінген. Оқыс оқиға 14 қарашада түскі уақытта қаланың Әуезов ауданында, Жандосов көшесі бойындағы үйлердің бірінің ауласында болған. Құтқару қызметінің мамандары сол маңға барып, ауланы құлаған ағаштан тазалаған, зардап шеккендер жоқ.
Аудандағы ағаштарды кесу жұмыстары мемлекеттік сатып алу негізінде жеке мердігерге тапсырылғаны анықталды. Бірақ құлаған тал апаттық ағаштар тізіміне енбепті.
«Автокөліктерге келтірілген шығынды өтеу үшін көлік иелеріне сот органдарына жүгіну ұсынылады. Сот кінәлі тұлғаларды анықтап, жауапкершілікті тағайындайды. Егер сот шешімі зардап шеккен тараптың пайдасына шықса, мемлекеттік органдар туындаған шығынды Қазақстан Республикасының қолданыстағы заңнамасына сәйкес өтеуге міндетті», - деді Әуезов ауданы әкімдігі көріктендіру бөлімінің бас маман Зәуре Қалпенова.
