Тараз қаласы әкімдігінің қаржы бөлімінің лауазымды тұлғаларына қатысты бірқатар заңбұзушылық бойынша сотқа дейінгі тергеп-тексеру басталды. Бұл туралы бүгін, 30 шілдеде Қаржылық мониторинг агенттігі айтты, деп хабарлайды «Адырна» тілшісі.
«Қала әкімшілігінің қызметкерлері мемлекет кірісіне түскен тауарлық-материалдық құндылықтардың есепке алынбауын пайдалана отырып, ресми құжаттарды қолдан жасау жолымен сот үкімдері бойынша тәркіленген коммерциялық жылжымайтын мүлік пен халық тұтынатын тауарларды мекеменің балансынан заңсыз шығарып алған. Аталған азаматтардың заңсыз әрекеттерінен келтірілген залал сомасы 100 млн теңгеден асады»,—делінген хабарламада.
Қазіргі таңда тиісті сараптамалар жүргізіліп жатыр.
