Бішкекте Сорос-Қырғызстан қоры қызметін тоқтатпақ, деп хабарлайды “Адырна” ұлттық порталы Interfax агенттігіне сілтеп. Агенттік мұны Қырғызстанда коммерциялық емес ұйымдардың жұмысын шектейтін заңның қабылдануынан кейінгі жағдай ретінде түсіндіруге тырысқан. Алайда бұл қор бұдан алдын Қазақстанда да өз жұмысын тоқтатқан болатын.
Қор өз жұмысын сонау 1993 жылы Қырғызстанда бастады, жалпы сомасы 115 миллион долларды құрайтын түрлі бастамаларды қолдады. Қолдау көрсетілетін жобалар ауқымы денсаулық сақтау, технология, білім беру және ақпараттық технологиялар салаларындағы бастамаларды қамтиды.
Бұған дейін Қырғызстан президенті Садыр Жапаров коммерциялық емес ұйымдарды қудалау туралы ақпаратты жоққа шығарып, жаңа заңда мұндай әрекеттер қарастырылмағанын алға тартқан еді. Ол мемлекет тарапынан ешқандай шектеулер мен қудалаулардың болмайтынына жеке кепілдік берген болатын.
