Алматы қаласының Төтенше жағдайлар департаменті қала тұрғындарына ауа райы туралы ескерту жасады, деп хабарлайды «Адырна» тілшісі.
Департамент бүгін, 16 ақпанда қалада жауын-шашын, көктайғақ болып, ауа температурасының күрт төмендеуі күтілетінін атап өтті.
«Аяз фонында электр желілерінің шамадан тыс жүктелуінен, электр құралдарын пайдалану ережелерін бұзудан, газ жабдықтарын, көмір пештерін дұрыс пайдаланбау және қолдан жасалған жылыту құрылғыларын пайдалану салдарынан тұрмыстық өрттердің шығу ықтималдығы артады. Демалыс күндері сынап бағанасы - 20 градусқа дейін төмендейді»,—делінген хабарламада.
Алматы қаласы ТЖ департаменті ескертеді:
- бірнеше электр құрылғыны бір розеткаға қосуға қатаң тыйым салынады;
- тоқ көздеріне қосылған электр құрылғыларын ұзақ уақыт қараусыз қалдыруға болмайды;
- электр құрылғысының қатты қызуы немесе сымдардың зақымдалған оқшаулауы анықталған жағдайда, оны дереу тоқтан ажыратыңыз.
