Батыс Қазақстан облысындағы Шағатай ауылдық округі әкімі аппаратының бас маманы 12 млн теңгеден астам бюджет қаражатын жымқырған. Бұл туралы облыстық прокуратураның баспасөз қызметі айтты, деп хабарлайды «Адырна» тілшісі.
Қызметкер 2020 жылдан 2023 жылға дейінгі кезеңде өзінің карточкалық шотына заңсыз ақша аударып отырған.
«Бұл факт Қылмыстық кодекстің 189-бабының 3-бөлігі бойынша сотқа дейінгі тергеп-тексерудің бірыңғай тізіліміне тіркелді. Кейіннен сотқа дейінгі тергеп-тексеруді жүргізу үшін Батыс Қазақстан облысы бойынша Экономикалық тергеп-тексеру департаментіне жолданып, тергеу нәтижесі бойынша іс сотқа жолданды»,—делінген хабарламада.
Сот үкімімен әкімдік қызметкері 3 жылға бас бостандығынан айырылып, қылмыстық-атқару жүйесінің орташа қауіпсіз мекемесінде жазасын өтеу тағайындалды. Үкім заңды күшіне енген жоқ.
