Елімізде 3,3 млн-нан астам адамды жұмысқа орналастыру жоспарланып отыр

1282
Adyrna.kz Telegram

Елімізде жастарды жұмысқа орналастыру іс-шарасына өзгерістер енгізілді. Бұл туралы ҚР Премьер-Министрінің орынбасары Алтай Көлгінов мәлімдеді, деп хабарлайды «Адырна» тілшісі.

Айтуынша, оқуды енді бітірген тәжірибесіз жастардың бәрі бірдей жұмысқа тұра алмайды.

«Осы үшін «NEET жастар» ұғымы (оқымайтын, жұмыс істемейтін және біліктілігі жоқ жастар) заңнамалық түрде бекітілген. Жастардың басым бөлігін мемлекеттік қолдау шараларымен қамту үшін Мемлекет басшысының тапсырмасы бойынша олардың жасы 35 жасқа дейін ұлғайтылды. Осылайша, жастар саны 5,7 млн адамға дейін өсті»,—деді ол.

Алтай Көлгінов бұл мәселе бойынша қандай шаралар қабылданып жатқанын атап өтті.

«Бірінші. 2022 жылдың наурыз айынан бастап «Жастар практикасы» (6 айдан 12 айға дейін, 25-тен 30 АЕК-ке дейін) және «Алғашқы жұмыс орны» (12-ден 18 айға дейін, 20-дан 30 АЕК-ке дейін) жобалары бойынша ұзақтығы мен жалақысы ұлғайтылды. Бұл шаралар 177 мыңнан астам жасты жұмысқа (оның ішінде 107 мыңнан астамы тұрақты жұмыс орындарына) орналастыруға мүмкіндік берді.

«Бастау бизнес» жобасы аясында 70 мыңға жуық жас онлайн-оқытудан өтті; «Жасыл ел» жобасы бойынша 2025 жылға дейін жыл сайын елді мекендерді абаттандыру мақсатында ақылы маусымдық жұмысқа 30 мың жас жұмылдырылатын болады.

Екінші. Мемлекет басшысының тапсырмасы бойынша 21 жастан 35 жасқа дейінгі жастар үшін жылдық 2,5% жеңілдікпен шағын несие беру тетігі енгізілуде. Несиенің ең жоғары сомасы – 5 млн теңгеге дейін. 2023 жылы 6 мыңға жуық шағын несие беру жоспарланып отыр.

Өз бизнесін ашу үшін 12 мыңнан астам жасқа 400 АЕК (1 млн 200 мың теңгеден астам) мөлшерінде гранттар берілді.

Үшінші. Жаңа әлеуметтік кодекс аясында 3,3 млн-нан астам адамды, оның ішінде 2,3 млн жасты жұмысқа орналастыру жоспарланып отыр. Нақтырақ айтқанда, ұлттық жобалар мен бизнестің жеке бастамалары аясында құрылатын жаңа жұмыс орындары, мемлекет субсидиялайтын жұмыс орындары, өз ісін ашуға арналған құралдар; жұмыс күшінің табиғи реттелуіне байланысты бос орындар және т.б.

Төртінші. 2 қалада және 6 облыста жастарға арналған өңірлік тұрғын үй бағдарламалары іске қосылды»,—деді Премьер-Министрдің орынбасары.

Сөз соңында ол Мемлекет басшысының жастарды жұмыспен қамту және әлеуметтендіру мәселелерін ерекше бақылауда ұстайтынын атап өтті.

Пікірлер
Ұқсас жаңалықтар
Серіктестер/Партнеры
Студия IMA - создание сайтов Доставка цветов Астана - Lova Buket