"Банк ЦентрКредит" биыл наурызда Ресейге қарсы санкцияларға ұшыраған Альфа-Банк Қазақстанды сатып алу келісімін жасады. Бұл туралы БЦК баспасөз қызметі мәлімдеді, деп хабарлайды “Адырна” ұлттық порталы.
"Альфа-Банк" АҚ пен "Банк ЦентрКредит" АҚ Қазақстандағы "Альфа-Банк" ЕБ АҚ-ты сату туралы түбегейлі келісімге келді. "Банк ЦентрКредит" жай акциялардың 100 пайызын сатып алу арқылы Қазақстандағы Альфа-Банктің жаңа акционері атанады. Қайта тіркеуден өткеннен кейін банк жаңа ECO BANK брендімен жұмыс істейтін болады. Толық атауы - "ECO BANK" ЕБ АҚ", - делінген хабарламада.
БЦК мәліметінше, банк өнімдерінің барлық шарты клиенттер үшін өзгеріссіз қалады және SDN тізімінен шығу процедурасы аяқталғаннан кейін клиенттер банк қызметінің барлық спектріне қол жеткізе алады.
"Қазір тұтынушыларымызға ыңғайлы болу үшін bcc.kz сайтында сұрақ-жауап форматындағы ақпараттық жадынама орналастырылды. Қосымша сұрақтар бойынша жеке тұлғалар үшін 505, заңды тұлғалар үшін 605 нөміріне хабарласуларыңызды сұраймыз", - деді БЦК өкілдері.
