Украина президенті Владимир Зеленский Ресей агрессор елінің билігі жаһандық институттар мен әлемдік құндылықтарды құрметтемейтінін хабарлады. Бұл туралы Мемлекет басшысы БҰҰ Бас хатшысы Антониу Гутерришпен кездесуден кейінгі кешкі үндеуінде айтты, деп жазады "Адырна" ұлттық порталы.
Зеленский БҰҰ өкілінің Буча мен Бородянкаға сапары Ресей Федерациясы армиясының Украинадағы әрекеттерінің ауырлығын түсіну үшін өте маңызды екенін атап өтті.
«Украинадағы Ресей армиясы Екінші дүниежүзілік соғыстан кейін жаһандық тәртіп негіз болған барлық нәрсені: БҰҰ Жарғысын, халықаралық конвенцияларды, декларацияларды, адамдар мен мемлекеттердің құқықтарын әдейі және сөзсіз таптады. Әлемдегі еркіндік пен қауіпсіздікке кепілдік беруі тиіс нәрсенің бәрі Ресейдің агрессивті әрекеттерімен жойылды», - деді Мемлекет басшысы.
Мемлекет басшысы 28 сәуірде Киевке жасалған зымырандық шабуыл Ресейдің халықаралық құқық пен әлемдік ұйымдарға деген шынайы көзқарасын көрсететінін атап өтті.
«Киевтегі келіссөздеріміз аяқталғаннан кейін бірден қалаға ресейлік зымырандары ұшты. Бес зымыран. Бұл Ресейдің жаһандық институттарға деген шынайы көзқарасы, Ресей басшылығының БҰҰ-ны және Ұйым ұсынатын барлық нәрсені қорлау әрекеттері туралы көп нәрсені айтады. Демек бұл тиісті күшті реакция қажет дегенді білдіреді», - деді Зеленский.
"Адырна" ұлттық порталы
