Елімізде алғаш рет педофилге ең ауыр жаза берілді

2563

Маңғыстау облысында Қазақстанда алғаш рет жас балаға қатысты жыныстық зорлық-зомбылық жасағаны үшін өмір бойына бас бостандығынан айыру жазасы тағайындалды, деп хабарлайды «Адырна» ұлттық порталы Маңғыстау облыстық сотының баспасөз қызметіне сілтеме жасап.

Судья істі 25 қаңтарда мемлекеттік айыптаушының, жәбірленушінің заңды өкілінің, сотталушының және оның қорғаушысының қатысуымен жабық тәртіппен қарады.

Прокурор соттан сотталушыға өмір бойы бас бостандығынан айыруды тағайындауды сұрады, онымен жәбірленушінің заңды өкілдері келісті.

- Сот сотталушы өзінің танысының пәтеріне өткен жылдың 28 мамырында түнгі уақытта келгенін анықтады. Ол мас күйінде болған. Жәбірленушінің анасының жоқтығын пайдаланып, баланың жас екенін біле отырып, ол жәбірленушінің дәрменсіз жағдайын пайдаланды. Сотталушы баланы бетіне және басына бірнеше рет ұрып, физикалық зорлық-зомбылық жасады. Осыдан кейін ол балаға қатысты зорлау және басқа да жыныстық әрекеттер жасады. Кінә сенімді түрде анықталғандықтан, сот барлық эпизодтар бойынша үкім шығарды. Қылмыстық құқық бұзушылықтар жасалған кезде мас болу жағдайы ауырлататын мән-жай деп танылды. Судья қылмыстардың сипаты мен дәрежесін ескере отырып, сотталушыға Қазақстан Республикасы Қылмыстық Кодексінің 58 - бабының 4-бөлігіне сәйкес өмір бойы бас бостандығынан айыру түріндегі жаза тағайындады, - деп хабарлады соттың баспасөз қызметі.

Егер қорғаушы наразылық білдірмесе немесе шағымданбаса, үкім заңды күшіне енеді.

Пікірлер
Ұқсас жаңалықтар